Hemeroteca web | RSS  RSS     Xoves 13.02.2020 Actualizado 10:19
El Correo Gallego Radio Obradoiro CorreoTV Anova

Galicia Hoxe

Noticia 1 de 1 Galicia  |   RSS - Galicia RSS

Galicia leva a Fitur unha caseta interactiva protagonizada polo Xacobeo e por un 'Camiño de Santiago' virtual

A área institucional galega acollerá máis de 40 presentacións e promocionará elementos singulares como o turismo de mergullo ou o rural

Presentación da caseta de Galicia en Fitur - FOTO: XUNTA
Presentación da caseta de Galicia en Fitur - FOTO: XUNTA

SANTIAGO. EP  | 17.01.2020 
A- A+

Converterse nun peregrino virtual e experimentar en primeira persona as sensacións de facer o Camiño de Santiago, esta é unha das actividades centrais que se atoparán os visitantes da caseta de Galicia na Feira de Turismo de Madrid (Fitur), un espazo de case 1.000 metros cadrados, totalmente renovado, que apostará polas novas tecnoloxías con ferramentas como o Túnel do Camiño, no que se poderá realizar un percorrido virtual sensorial e inmersivo da Ruta Xacobea.

Así o anunciou este venres o conselleiro de Cultura, Román Rodríguez, e a directora de Turismo, Nava Castro, que presentaron as actividades e a caseta coa que Galicia promocionará os seus recursos na feira madrileña.

A nova caseta, avanzou o conselleiro, dedicará boa parte dos seus recursos ao Xacobeo 21 e á promoción do Camiño de Santiago, á vez que gardará espazos para outros elementos singulares da oferta galega.

En conxunto, exponse como un espazo que unirá elementos tradicionais, como a estética do traxe galego, con outros vangardistas, centrados nas novas tecnoloxías.

Neste sentido, Román Rodríguez asegurou que se trata dun espazo "sorprendente" que se expón como unha "simbiose entre o máis tradicional e o máis innovador" e que aposta por ferramentas interactivas co visitante.

TÚNEL DO CAMIÑO
Entre estes elementos innovadores está o prato forte da promoción galega, o Túnel do Camiño, no que o visitante poderá sentirse peregrino por un momento, un mapa interactivo do Camiño, no que están representados os 10 itinerarios da Ruta Xacobea, ou un probador virtual no que verse coa vestimenta propia dun peregrino.

Dentro da experiencia sensorial e inmersiva, na caseta estará tamén representado o proxecto Galicia Soa, que permite recrear sons da Comunidade, como as ondas ou o vento; e darase especial relevancia aos elementos singulares da oferta galega, como o turismo rural, os 'entroidos', o turismo náutico ou o mergullo.

Entre outras áreas, o espazo contará cunha zona 'Sesión Vermú', para reivindicar os vermús galegos, xestionada por profesores e alumnos do Centro Superior de Hostalaría de Galicia e nel desenvolveranse actuacións musicais, talleres de artesanía e máis de 40 presentacións promovidas por concellos, deputacións ou asociacións.

A caseta de Galicia en Fitur contará con máis de 16 espazos divulgativos e de información nos que estarán representados os principais elementos que caracterizan á Comunidade e acollerá encontros e reunións de profesionais da área.

PRESENTACIÓNS
Román Rodríguez adiantou que, a maiores dos elementos estables, a caseta acollerá tamén máis de 40 presentacións organizadas tanto pola Xunta como por distintas entidades. Entre as máis destacadas están a do Xacobeo 21, que terá lugar o mércores, a candidatura da Ribeira Sacra a Patrimonio da Humanidade ou 'Galicia destino Surf'.

Tamén se presentará neste marco a estratexia 'Galicia Sabe', centrada en facer da Comunidade un destino enogastronómico de referencia; Galicia Mice, sobre o turismo de congresos e seminarios; os trens turísticos de Galicia ou a 'Waoh Route!', a primeira ruta atlántica de turismo de mergullo, entre outros elementos.

Nava Castro destacou que esta feira supón o pistoletazo de saída da promoción galega para 2020, tras un 2019 no que se realizaron máis dun centenar de presentacións en 31 países. Este ano, as accións centraranse especialmente no Xacobeo 21, como antesala da súa celebración.

Grazas á acción promocional da Xunta, indicou a responsable de Turismo, os viaxeiros estranxeiros chegados á Comunidade duplicáronse na última década, pasando de 700.000 en 2009 aos 1,4 millóns rexistrados entre xaneiro e novembro do ano pasado.

Grupo Correo Gallego
Ante calquera dúbida, problema ou comentario nas páxinas de Galicia Hoxe envíe un e-mail a info@galicia-hoxe.com. Titularidade e política de privacidade. Política de Cookies
Auditoría Audiencia Sites
Titulares RSS