Hemeroteca web | RSS  RSS     Venres 11.10.2019 Actualizado 19:57
El Correo Gallego Radio Obradoiro CorreoTV Anova

Galicia Hoxe

Noticia 1 de 1 Galicia  |   RSS - Galicia RSS

Industria, sindicatos e administracións esixen seis meses á empresa para atopar solución aos peches

MADRID. EP  | 10.01.2019 
A- A+

A ministra de Industria, Comercio e Turismo, Reyes Maroto, asegurou que tras a reunión deste martes sobre o futuro de Alcoa entre Goberno, empresas, Galicia, Asturias e sindicatos, elaborouse un documento de mínimos no que, entre outros puntos, se lle esixe á empresa que fixe un prazo de seis meses para buscar unha alternativa ao peche das plantas en Avilés e A Coruña.

Maroto, nunha entrevista concedida á Cadena Ser recollida por Europa Press, afirmou que tamén se solicita a paralización do ERE posto en marcha pola compañía estadounidense en ambos centros españois e que se poida traballar cun escenario temporal máis amplo para atopar solucións ao problema.

"Hai solucións e estamos a avaliar proxectos", asegurou a titular da carteira de Industria, á vez que resaltou a necesidade dunha vontade por parte de Alcoa para chegar a solucións similares ás que se chegaron nos casos de Vestas e de Cemex.

"Onte Alcoa desmentía que estivese a bloquear a situación, iso non é certo. O bloqueo é certo e constátase cada día nas mesas que estamos a levar a cabo. Por tanto, se hai vontade por parte da empresa, o Goberno xa demostrou nos casos de Vestas e Cemex que se pode buscar unha solución de reindustrialización a calquera peche de empresa que se produza neste país", engadiu.

Pola súa banda, fontes de Industria explicaron a Europa Press que, tras seis horas e media de negociación, abriuse unha liña de traballo coa empresa, tras o bloqueo mantido os pasados meses nas diferentes reunións da mesa de traballo.

"Agora pásase a un escenario de prudencia no que se puxeron sobre a mesa varias propostas, entre as cales está establecer seis meses de prazo para analizar todo", engadiron ditas fontes.

ORZAMENTOS
Doutra banda, a ministra de Industria, Comercio e Turismo indicou que desde o Goberno van traballar para conseguir os apoios parlamentarios necesarios para sacar adiante os Orzamentos Xerais do Estado de 2019.

"Imos traballar para conseguir os apoios parlamentarios como o estamos facendo cada día que imos ao Parlamento con reais decretos. Hai unha maioría no Parlamento que está a dicir que as propostas que levamos son boas", asegurou Maroto.

Así mesmo, destacou que a vontade do Executivo é traballar e buscar acordos e resaltou que o que recolle os presupostos de 2019 é un "proxecto de país". "O noso traballo agora é buscar os apoios necesarios para que saian adiante", subliñou.

 

Grupo Correo Gallego
Ante calquera dúbida, problema ou comentario nas páxinas de Galicia Hoxe envíe un e-mail a info@galicia-hoxe.com. Titularidade e política de privacidade. Política de Cookies
Auditoría Audiencia Sites
Titulares RSS