Juárez di que os "proxectos faraónicos" de estacións do AVE non son "a prioridade"

O delegado do Goberno en Galicia, Samuel Juárez, considera que hai "outras obras" da liña da Alta Velocidade galega como "proxectos faraónicos" de estacións de ferrocarril que non son "a prioridade" nun momento no que a situación presupostaria "non é boa". "O que hai que facer é completar a liña, que o tren chegue, e xa faremos unha estación máis bonita un pouco máis adiante", destaca.

"O que queren os cidadáns é que rematen as obras e que se poida acceder á Meseta e se poida enlazar con Madrid a través da Alta Velocidade. Iso é o primeiro", reivindica Juárez nunha entrevista a Radio Nacional de España recollida por Europa Press.

Por iso, na súa opinión, esas outras "accións, que probablemente fosen obras doutras épocas de moita máis bonanza, pero que non son estritamente necesarias, haberá que deixalas para un poquito máis adiante".

Juárez ratifica que, para a ministra de Fomento, Ana Pastor, as obras de acceso da AVE á Meseta e o Eixe Atlántico "son obras prioritarias" que "van estar na parte máis alta das súas accións", pero aposta por dar "datas realistas" unha vez que se coñeza "en profundidade" o panorama presupostario do departamento e o estado técnico das actuacións. "E non empezar a dar datas sen coñecemento de causa", xustifica.

Aínda que supón que "pronto" Pastor "estará en condicións de dar estas datas", insiste en que "non conduce a nada seguir na dinámica de dar unhas a sabendas de que ían ser difíciles", en alusión ao obxectivo fixado en 2009, cando o límite temporal se puxo en 2015. Este propósito "era factible pero non se deron os pasos necesarios para facela real", asegura, sobre a xestión do anterior Executivo, antes de resolver o asunto: "Insistir nesa data non leva a nada".

ARTEFACTO

Preguntado polo artefacto que desactivaron os Tedax diante dunha oficina de emprego en A Coruña o pasado xoves, o delegado do Goberno subliña que hai que preocuparse, sen dúbida", pero constata que as forzas de seguridade "traballan con grande intensidade para tratar de controlar este tipo de fenómenos".

"Non se poden tomar por riba", advirte, pois "moitas veces" estas accións non chegan a máis "non porque non queiran senón porque non saben ou non pueden" as persoas, ás que non se debe ter "ningunha tolerancia", pois tratan de "facer dano".

ORZÁN

Sobre outro suceso tráxico, a morte de tres policías na praia do Orzán cando trataban de rescatar un estudante eslovaco, Juárez resalta que "este tipo de sucesos son o peor en calquera cargo, ter que perder xente que está a traballar ao teu servizo".

"Pero bo, o que me queda é o convencemento que xa tiña pero comprobei en primeira persoa: temos uns efectivos dunha calidade humana excepcional e cunha vocación de servizo tamén excepcional", proclama.

A recuperación dos corpos foi un "grande alivio" para os familiares e agora o responsable da Delegación do Goberno na Comunidade Autónoma espera "poder atopar o estudante eslovaco que falta".

No que respecta ao nomeamento de subdelegados do Goberno nas diferentes provincias, sinala que confía en "completar rapidamente todo este proceso", coa toma de posesión en Pontevedra, onde "aínda" non o ten "totalmente claro". Así, "está aínda por decidir" quen ocupará o posto.

SECTOR LÁCTEO E INCENDIOS

O delegado do Goberno foi cuestionado, así mesmo, sobre dous dos asuntos principais que xestionaba na súa anterior etapa como conselleiro de Medio Rural: o sector lácteo e os incendios.

Sobre o primeiro tema, apunta que xa falou co ministro de Agricultura, Miguel Arias Cañete, quen "probablemente estea en Galicia" en febreiro. "É consciente de que ese asunto está sen rematar", destaca, sobre o proceso de negociación de produtores e industrias para que os gandeiros teñan "moito máis protagonismo no mercado".

Acerca dos lumes forestais, avoga por "non utilizar" unha problemática "de orde pública" como "arma arrojadiza" no campo político e tamén por que haxa máis "coordinación" entre efectivos -- da Xunta e do Goberno central -- .

"Algún cambio legal será necesario probablemente para reforzar o control sobre os incendiarios sobre todo en casos de reincidencia, e para procurar que as multas e os castigos sexan un poquito máis eficaces", argumenta. Neste punto, "a Xunta ten xa avanzado unha proposta" á que Samuel Juárez presupón "que dará curso". "E eu tratarei de apoiar, loxicamente," finaliza.