Hemeroteca web | RSS  RSS     Venres 14.06.2019 Actualizado 20:38
El Correo Gallego Radio Obradoiro CorreoTV Anova

Galicia Hoxe

Noticia 1 de 1 Galicia  |   RSS - Galicia RSS

Lídia Senra (En Marea) avoga por alternativas de transporte e esixe un plan que "reduza drasticamente" os coches

SANTIAGO. EP  | 20.05.2019 
A- A+

A candidata de En Marea-Compromiso por Europa, Lídia Senra, defendeu este luns unha alternativa ao transporte en vehículos privados, polo que esixiu un plan que "reduza drasticamente" os coches da estrada e permita outro tipo de desprazamentos.

Na mañá deste luns realizou entren desde Monforte de Lemos até Sarria, acompañada doutros integrantes da candidatura europea e da cabeza de lista das municipais de En Marea Sarria, Iván López.

Unha imaxe coa que quería propor un novo modelo de transporte que pase pola elaboración dun plan que "reduza drasticamente o uso de coches privados, como forma de contribuír a combater o cambio climático e para defender a calidade do aire".

Neste sentido, como explicou neste acto electoral co que arrinca a última semana de carreira cara ás urnas, é "necesario potenciar e promover os transportes públicos". "Cremos que o tren é un elemento fundamental; necesitamos que se potencien os trens de proximidade, con frecuencias e paradas útiles para a maioría da poboación e para conectar as pequenas e medianas vilas, non só as grandes cidades", reclamou.

E dito isto, incidiu, como fixo ao longo desta campaña para outros servizos --como a auga ou o tratamento de residuos--, é preciso que o ferrocarril "sexa un servizo de transporte público cento por cento".

En clave de repaso do traballo realizado esta lexislatura, Lídia Senra lembrou que para defender os ferrocarrís públicos, votou en contra do paquete ferroviario europeo, que "implica medidas no camiño de favorecer a privatización dos servizos de transporte".

Por iso, a eurodeputada comprometeuse a seguir traballando, após as eleccións do próximo 26 de maio, en defensa dos transportes públicos.

Grupo Correo Gallego
Ante calquera dúbida, problema ou comentario nas páxinas de Galicia Hoxe envíe un e-mail a info@galicia-hoxe.com. Titularidade e política de privacidade. Política de Cookies
Auditoría Audiencia Sites
Titulares RSS