Máis de mil persoas subscriben un manifesto en apoio aos denunciados por "defender o galego"

Máis de mil persoas subscribiron o manifesto 'queremos xustiza para a nosa lingua: non á criminalización na súa defensa!, co fin de trasladar o seu apoio ás persoas denunciadas polo xuíz decano de A Coruña, Antonio Fraga Mandían, tras esixirlle que cumpra a Lei de Normalización Lingüística e respecte a toponimia.

Entre os asinantes atópanse escritores como Agustín Fernández Paz, Yolanda Castaño, Xavier Alcalá, ou Teresa Moure, xunto a outras persoas destacables do ámbito social e cultural galego, como Carlos Blanco, Bieito Romero ou Antón Reixa.

A Mesa pola Normalización Lingüística recordou que o propio xuíz denunciou ao presidente da asociación, Carlos Callón, tras recriminarlle unha frase na que Fraga Mandián aseguraba non ter "ningún rubor en usar a ilegalidade do topónimo La Coruña" e pedirlle, ademais, que cumpra coa lexislación. Esta situación foi criticada polo parlamentario do BNG Carlos Aymerich, que á súa vez foi denunciado polo xuíz decano.

En declaracións a Europa Press, Callón insistiu en que non cometeron "máis delito" que esixir o cumprimento da lexislación vixente, polo que considera que se trata dun xuízo "disparatado" que parece "unha comedia de situación".

Con motivo do xuízo ao presidente de A Mesa, os representantes das persoas asinantes do manifesto chaman a participar nunha concentración protesta ante o Xulgado de Instrución nº2 de A Coruña ás 12.00 horas deste venres.