Hemeroteca web | RSS  RSS     Xoves 18.10.2018 Actualizado 20:34
El Correo Gallego Radio Obradoiro CorreoTV Anova

Galicia Hoxe

Noticia 1 de 1 Galicia  |   RSS - Galicia RSS

En Marea culpa á Xunta da "alta conflitividade laboral" que atravesa Galicia

Villares sinala que Galicia foi a segunda comunidade na que máis horas de traballo se perderon en 2017 por culpa de conflitos laborais

SANTIAGO. EP  | 16.04.2018 
A- A+

O portavoz de En Marea, Luís Villares, culpou á Xunta da "alta conflitividade laboral" que atravesa Galicia, como reflicten os datos de senllos informes do Ministerio de Traballo e da Subdelegación do Goberno que sitúan á Comunidade galega como a segunda do Estado con maior perda de horas de traballo durante 2017 por mor de conflitos de índole laboral, só por detrás de Cataluña.

Nunha comparecencia de prensa celebrada este luns no Pazo do Hórreo, Luís Villares centrou as súas palabras nas mobilizacións que se rexistran estes días en Galicia, protagonizadas polos pensionistas, os traballadores de Xustiza na "folga máis longa da Administración pública galega" e as protestas previstas esta semana por parte dos estudantes, que convocaron paros para este xoves 19 de abril.

Así, sinalou que para atopar datos similares aos de 2017 no relativo a horas perdidas por conflitos laborais hai que remontarse a 2009, en "plena crise" económica, situación que contrastou á "fase alcista" que atravesa España desde o pasado ano.

"Por que non vivimos mellor que en 2009?", preguntouse Villares, para a continuación, incidir en que "hai máis diñeiro, pero está peor repartido" porque a crise foi "unha escusa" para "recortar dereitos" e que, nestes momentos de mellora das cifras económicas, "a xente non admite que lles roubaron".

Deste xeito, trasladou o apoio de En Marea ás mobilizacións de pensionistas, funcionarios de xustiza en folga e dos estudantes que realizarán paros para reclamar unha educación "que se aparte a Lomce de Galicia", o fin da "segregación por sexo" e a posta en marcha dun sistema educativo que forme "para traballar aquí, non para emigrar".

En canto ás protestas do colectivo de pensionistas, Villares insistiu en que, para que o sistema público sexa viable, debe aumentar, tanto en número como en calidade, as cotizacións á seguridade, algo que non se logrará, ao seu xuízo, ata que non se derrogue a reforma laboral de 2013 aprobada polo PP.

Grupo Correo Gallego
Ante calquera dúbida, problema ou comentario nas páxinas de Galicia Hoxe envíe un e-mail a info@galicia-hoxe.com. Titularidade e política de privacidade. Política de Cookies
Auditoría Audiencia Sites
Titulares RSS