Hemeroteca web | RSS  RSS     Luns 19.02.2018 Actualizado 18:06
El Correo Gallego Radio Obradoiro CorreoTV Anova multiconsulting

Galicia Hoxe

Noticia 1 de 1 Galicia  |   RSS - Galicia RSS

En Marea, sobre o veto do ministro de Fomento ao traspaso da AP-9: "Estamos gobernados por trileiros e mentireiros"

Subliña que o PPdeG "claro que podería facer máis" ante este "espolio", pero Feijóo "nunca pon o berro no ceo"

SANTIAGO. EP  | 14.02.2018 
A- A+

O viceportavoz de En Marea no Parlamento galego, Antón Sánchez, lamentou estar "gobernados por trileiros e mentireiros" despois da intervención do ministro de Fomento no Congreso en relación co veto do Goberno ao traspaso da autoestrada AP-9 a Galicia.

A preguntas dos xornalistas en rolda de prensa, Sánchez aseverou que é "totalmente falso" un dos argumentos que utilizou o ministro, Íñigo de la Serna, ao aludir a un custo do rescate valorado nuns 4.000 millóns de euros.

Ao seu xuízo, "volveu faltar ao respecto aos galegos" na súa resposta á deputada por En Marea na Cámara Baixa Alexandra Fernández, posto que a última proposición de lei que enviou a Cámara autonómica ao Congreso para debater esta transferencia foi elaborada polos letrados do Parlamento de Galicia e "non falaba de rescate".

Fronte a esta "mentira descarada", o viceportavoz de En Marea denunciou que os membros do Goberno de Mariano Rajoy "traballan para a empresa", en relación á concesionaria da AP-9, que é Audasa.

"COMPLICIDADE"
Esta empresa ten un "negocio incomparable", advertiu, "grazas á privatización" e posterior "consolidación vía BOE", mediante os distintos convenios fixados polo Executivo central.

O Partido Popular galego, segundo agregou, "claro que podería facer máis" ante este "espolio". Neste sentido, instou a Feijóo a "exercer" en defensa dos dereitos dos galegos "e non de mandado, sumiso e dócil do poderoso". "Nunca pon o berro no ceo", reprobou, acusando o presidente da Xunta de "complicidade" con Rajoy.

Grupo Correo Gallego
Ante calquera dúbida, problema ou comentario nas páxinas de Galicia Hoxe envíe un e-mail a info@galicia-hoxe.com. Titularidade e política de privacidade. Política de Cookies
Auditoría Audiencia Sites
Titulares RSS