O mellor e peor de 2011 (II): Galicia (xaneiro a xuño)

Este é un resumo subxectivo mais veraz e comprometido do 2011 que deixamos, dende a perspectiva de Galicia. A lingua, a economía e o emprego, a educación, a sanidade e os medios de comunicación, especialmente os públicos, foron os eixos deste curso especialmente convulso. Coa intención de facer memoria para non errar no futuro, é tamén unha homenaxe á prensa en galego, que este ano nos deixou máis orfos que nunca, a través das súas informacións e reportaxes, principalmente de Galicia Confidencial, Galicia Hoxe e Novas da Galiza (con algún puntual artigo de calidade en castelán esclarecedor sobre a cultura galega), aínda supervivintes, xunto a outros como A Peneira Dixital, Tempos Dixital, Diário Liberdade, Galiza Livre, De Luns a Venres, O Sil, Mundourense… coa dor de que non poderemos lembrar os excelentes traballos de Xornal de Galicia e A Nosa Terra, para sempre exterminados mesmo nas hemerotecas web. E busca revitalizar a prensa en galego, lendo esa propia prensa coas súas ligazóns orixinais, ao volvermos sobre as liñas que nunca debían de borrarse da nosa memoria.

1. Da Lei de Educación á desaparición de Galicia Hoxe

O goberno de Feijóo comezou o 2011 facendo balance, coma nós, de 2010, aínda que cun pouquiño menos de autocrítica e facendo un “top-ten” sobre “o mellor do ano”, no que coloca na primeira posición o suposto “éxito” da fusión das caixas, que co decorrer do ano daría un xiro que todos coñecemos. No segundo lugar, o polémico “Decreto do Plurilingüismo”, que reduciu o número de horas do galego no ensino e describe como “fundamentado no equilibrio lingüístico, na liberdade, na máxima participación dos pais e que ofrece a posibilidade de introducir o inglés no ensino público”. Para os conservadores, “deste xeito”, o Goberno galego consolidaba “a súa aposta por un ensino moderno, orientado ao futuro e que aproxima Galicia ao mundo”. O mesmo ensino que este 2011 se lles rebelou, dende todas as instancias e ámbitos (alumnos, pais, profesores, persoal de servizos e investigadores, sindicatos… desde a educación obrigatoria á universitaria e a formación profesional), e a posición de Galicia no mundo non se viu peor representada coas pésimas formas de personaxes como o Secretario Xeral de Política Lingüística Anxo Lorenzo, agora premiado coa Secretaría de Cultura da Xunta, ou os directivos das caixas que foron responsables de afundir o seu capital e malvender os aforros de milleiros de galegos:  José Luis Pego, Gregorio González Gurriarán, Óscar Rodríguez Estrada, e Javier García De Paredes, entre outros. Tampouco a suposta representación “galega” no Estado por políticos que agora están no Goberno, como Rajoy ou Ana Pastor, nos beneficia moito ou nada.

Os supostos avances nas infraestruturas deixaron de lado o tan traído e levado AVE e conformáronse cun Avant que non só é o máis caro do Estado e por suposto máis có tren de media distancia, senón que discrimina as vilas e o interior de Galicia e marxina a rede de rexionais, renunciando a mellorar os seus servizos e a afondar nas comunicacións . A investigación e a educación resíntense, con numerosas folgas, peches, e casos vergoñentos como o das bolsas Parga Pondal, mentres os profesores se mobilizan, practican a desobediencia civil lexítima dando aulas en galego, e os recortes en Sanidade medran mentres se desactivan as tarxetas sanitarias de miles de parados, e todo isto cando aflora a corrupción a nivel local e nacional, con casos como o “Orquestra”, “Arena” ou “Campión”, e a suposta rama galega do “Gürtel”, e coa taxa de paro máis alta da historia de Galicia. Os medios en galego tamén foron, desta vez, tristes protagonistas, desaparecendo un tras doutro e reducíndose á súa mínima expresión, co peche sistemático e imparable de cabeceiras que usaban o idioma propio, mesmo moitas históricas: Galicia Hoxe, A Peneira, A Nosa Terra e Xornal… pero isto vese acompañado dunha mobilización cidadá que reclama medios en galego, e de novas propostas e esperanzas para o sector da comunicación no noso país como Tempos Novos Dixital, Praza Pública ou Sermos Galiza, ademais da consolidación de Galicia Confidencial como medio en galego máis lido, e segundo en Galicia só detrás de La Voz, do que se demostran graves campañas de intoxicación informativa, xunto a outras cabeceiras.

O movemento popular e asociativo segue máis vivo ca nunca no país do Nunca Máis, con plataformas como SOS Sanidade Pública, Por uns Medios Públicos de Calidade, Queremos Galego, a Marcha polo Emprego, ou a Marea Verde pola Educación Pública, e a mobilización cidadá é aínda máis masiva, global e exemplar a partir do 15 de maio, manifestándose na rúa e acampando, debatindo e facendo democracia nas prazas das cidades e vilas, e demostrando máis unha vez que a sociedade galega está viva, a pesar dos recortes e as manipulacións, e confirmando, sobre todo despois das eleccións do 22-M e do 20-N, a crise no seo de todos os partidos, PSOE e BNG incluídos. Eis un resumo a modo de revista de prensa dos primeiros seis meses, coas ligazóns ás fontes orixinais:

Xaneiro: Comeza 2011, e a pesar do que nos di a mensaxe de fin de ano do presidente da Xunta, Galicia é a quinta comunidade onde máis se destruíu emprego en 2010. Ademais de coa maquinaria propagandística do PP, empeza 2011 con ataques de grupos independentistas a sés socialistas, desta vez tocándolle a Betanzos. As accións destes grupos e o cerco policial sobre delas va aumentando ao longo do ano até o episodio de novembro, no que se evita un atentado maior. Pero volvendo á rutina política, comeza con Feijóo de vacacións no Brasil, mentres o paro en Galicia bate marcas nunca vistas, chegando a ser a segunda comunidade autónoma con maior número de desempregados, e cando se aproba o anteproxecto da Lei de Educación nunha “estratexia de escamoteamento e ocultación”, segundo Abel Losada, voceiro parlamentar do PSdG. Aymerich, voceiro de BNG, pídelle explicación ao PPdG sobre quen costea esa viaxe, e Alfonso Rueda contéstalle que “ten a conciencia sucia”. Algúns deputados da Cámara baixa reciben clases de galego oral, dado o seu alto índice de erros, ademais de consellos sobre a súa oratoria, pero iso non impide que Beatriz Mato masque chicle mentres Aymerich lle recorda os 600.000 galegos que viven por baixo do limiar da pobreza. Comeza o servizo de tradución no Senado español, financiado con cartos descontados doutras partidas, con reticencias do PP, e unha senadora súa é a única galega que non usa a súa lingua propia na Cámara Alta, a pesar de coñecelo, “para que todos a entendan”. Por outra banda, os investigadores denuncian que rematou 2010 sen a Xunta convocar unha soa praza de investigación das xa poucas, 15, que prometera.

Un sumario que desaparece e un alcalde que presuntamente acosa a súa secretaria ofrecéndolle postos na Xunta. Estes son algúns dos ingredientes do xuízo por acoso sexual que comeza contra o ex alcalde de Porriño. A Policía rastrexa o Gürtel en Cambados, mentres a dirección socialista denuncia a presión mediática de La Voz de Galicia e o cambio de rumbo na súa liña editorial, antiPSOE despois das últimas eleccións autonómicas. Os populares denuncian presuntos casos de espionaxe do goberno do bipartito e GC publica o informe que, segundo La Voz, serviu para investigar ao BNG e que para o PP “é un novo Watergate”. Touriño nega todo, pero ese “Watergate” acaba desinflándose, e BNG e PSOE acaban denunciándoo como unha “campaña de acoso aos gobernos bipartitos” que emprega a La Voz de Galicia como “parvo útil”. Un síntoma desa política exterminadora do legado do bipartito é a desaparición dun monumento “ao diálogo” polo que se pagaron 60.000 euros e que desaparece de repente. GC publica fotos exclusivas do monumento botado a unhas silveiras.

O BNG propón quitar a pensión aos expresidentes Aznar e González. O Encontro Irmandiño de Beiras convírtese en referencia. Feijóo entra pola porta de atrás dun congreso en León

para evitar aos mineiros, ao igual que Rajoy, e polo menos un ferido no enfrontamento entre mineiros leoneses e policías á entrada do cumio do PP. Os traballadores pretendían falar co presidente galego sobre o decreto do carbón. Xosé Manuel Lage Tuñas, do PSdG, publica a súa nómina e a súa declaración de bens e leva ao Parlamento o debate sobre a transparencia, descubríndose que os políticos galegos non queren publicar os seus bens. Ironicamente, tres días despois, Feijóo inicia unha xira por España para apoiar aos candidatos populares ás autonómicas, esgrimindo como un dos seus principais argumentos o crédito na política: “No nos avergonzamos de dedicarnos a la política”, afirma.

A “insubordinación” de Vicente Irisarri volveu poñer contra as cordas a toda a estructura política do PSdeG. Despois de varios ataques a sés do PP e PSOE, tamén a central do BNG sofre un ataque no inicio da folga do 27 de xaneiro, xunto á sé socialista en Negreira. Nunha reportaxe de “El Mundo”, Rajoy anuncia que, de ser presidente, fará reformas legais para privatizar a CRTVG. O O BNG conmemora o 125 aniversario do nacemento de Castelao, denunciando o "españolismo" que se apropia da súa imaxe e que "enterra e sepulta" a súa vertente política. E unha folga xeral convocada pola CIG “polas pensións e o emprego”, e apoiada por, entre outros, BNG e Galiza Non Se Vende, reúne a case tanta xente como na convocada anteriormente xunto aos dous sindicatos que xa non participan nesta, CCOO e UXT.

Anxo Lorenzo cre “irresponsable” usar o galego no Senado.

A Universidade de Santiago está a piques de iniciar a construcción do terceiro centro de investigación de tecnoloxía da información. O audiovisual galego reacciona aos recortes e o actor Xosé Manuel Olveira, “Pico”, alerta das dificultades para celebrar os premios Mestre Mateo. Galicia Hoxe fala das novedades cinematográficas para 2011. Francisco López, Director Xeral do Libro, louva a axuda da RAG, na sesión da Cidade da Cultura vencellada a Manoel Antonio. Dúas asociacións loitan por atopar 300.00 naipelos arrebatados ás súas nais dende os anos 40, os nenos roubados do franquismo. Ademais o xuíz Pedraz inicia a investigación da morte de Couso, e o Consello Escolar rexeita o borrador do anteproxecto de Lei de Convivencia e solicita a súa devolución.

Novas da Galiza publica informacións exclusivas tanto sobre a reunión de Rajoy con narcotraficantes, como sobre o incremento da actividade de Resistencia Galega. Tamén salienta que Galiza recupera a iniciativa coa “greve geral nacional”.

En Xornal de Galicia, unha entrevista a Peter Eisenman, arquitecto da Cidade de Cultura, arrebátalles declaracións tan soberbias como a seguinte: “Antes do Gaiás, Galicia non estaba en ningures, só era un lugar relixioso”. Lamentablemente, non poderemos nunca revivir estas liñas, posto que o primeiro xornal electrónico de Galicia xa non existe e os textos foron borrados para sempre do seu servidor.

Febreiro:

As eleccións están aí xa, e nótase. Converxencia XXI presenta en Santiago a súa primeira candidatura. Carlos Amoedo e Filipe Díez danse de baixa do BNG. Conde Roa recupera a Fraga para a precampaña, invitándoo á presentación da súa candidatura. Celébrase a convención do PP en Compostela, no que Feijóo volve coa teima da austeridade e a maldade intrínseca dos bipartitos. Entre os invitados, Dolores de Cospedal e Mariano Rajoy, e curso de novas tecnoloxías para os candidatos incluído, o que despois se notará na proliferación de perfís en redes sociais, que se esvaecerán coa mesma rapidez que as promesas dos políticos. O clan dos Baltar fai demostración de forza en Santiago e Ourense.

Iníciase a operación “Orquestra”, e o PPdG descarta botar de momento aos alcaldes e demais cargos detidos no marco da investigación. PP e PSOE acenden de novo o ventilador das corruptelas. Mentres o PP lanza unha ofensiva contra a suposta fraude fiscal do líder socialista, vídeo "anónimo" incluído, o PSOE contraataca recordando os presuntos vencellos dalgúns conservadores con narcotraficantes, unha acusación que ratifica o propio Laureano Oubiña. Ás veces, o ventilador tamén espalla o lixo na dirección contraria á querida, salpicando a un mesmo, como pasou a Negreira, que denuncia cun suposto vídeo anónimo as obras do alcalde socialista, pero descúbrese ao final que o autor é un ex alto cargo popular.

Xosé Manuel Beiras é designado voceiro nacional do Encontro Irmandiño, a corrente que lidera dentro do BNG, coa presencia de Guillerme Fernández, mentres o BNG e grupos independentistas apoian e alentan a volta da esquerda abertzale á area política. Galicia Confidencial, na súa liña habitual de persecución da corrupción, presenta unha escolma de altos cargos en activo que non pagaron algún dos seus impostos, incluído o presidente da Xunta de Galicia. Falando de malgasto, o alcalde de Boqueixón, de PPdG, recoñece que se “dilapidaron moitos cartos, e eu fun dos que axudou a dilapidalos”. Comeza a guerra das enquisas de cara ás eleccións municipais de maio.

Ponse de manifesto os tópicos, a galegofobia e mesmo o autoodio cara ó uso do idioma propio nas verbas dunha concursante galega en Gran Hermano, que acenden as redes sociais e provocan as reaccións mesmo de BNG e Anxo Lorenzo. Sen embargo, a maior presenza do galego nas clases 2006 e 2009 axudou a mellorar a comprensión lectora en español e non prexudicou os resultados en ciencias, segundo a análise dos equipos de normalización do Informe Pisa. Feijóo presume de mellores resultados co bipartito, mentres as asociacións de investigadores acúsano de eliminar dous programas de bolsas, incluído un creado na era Fraga.

Algúns resístense, case dous meses despois, á Lei Antitabaco. Mentres, coñécese que máis de 9.000 galegos falecen ao ano por mor desta sustancia adictiva.

Novas da Galiza salienta en febreiro as mostras de solidariedade coa Casa das Atochas, así como unha trama corrupta relacionada coa explotación sexual das mulleres que implica a unha morea de poderes na capital de Lugo, e afonda no proceso de privatización impulsado pola nova Lei de Augas.

Marzo:

O delegado da Xunta en Ourense, Rogelio Martínez, é acusado outra vez de prevaricar, e protagonizará diversos episodios ao longo do ano. Preséntase en sociedade Converxencia XXI, con Carlos Vázquez Padín e Rafael Cuiña xuntos nunha conferencia, e o primeiro publicando un libro recompilatorio dos seus artigos en prensa, “Galeguismo e liberdade”. A Conselleira do Mar fai campaña dentro dunha igrexa. Feijóo mestura actos relixiosos e políticos. Nace do PP un partido contra Baltar, o POLI (Partido Ourensán Libre), cuxas siglas coinciden sospeitosamente co alcume do ex candidato á alcaldía de Ourense polo PP, Poly Nóvoa, quen nega ter relación.

Poñen unha pequeña bomba na antiga casa do alcalde de Santiago daquela, Xosé Manuel Sánchez Bugallo. O deputado do BNG Bieito Lobeira, o Colexio de Xornalistas, profesionais da información, militantes nacionalistas e veciños de Compostela denuncian a represión policial, especialmente na capital de Galicia, e o SUP, o principal sindicato de policías en Galicia, “presións da Delegación do Goberno para realizar identificacións”. Bieito Lobeira é intimidado pola Policía, o que motiva o seu recurso de amparo ante a Cámara Baixa.

O profesor de Ciencias Política Miguel Anxo Bastos Boubeta denuncia o sistema educativo diante do conselleiro de Educación que lle aplaude. Di que hai que sacarlles a “esquerdallada” da cabeza, para uns días despois retractarse no GC. O número dous de Conde Roa, dimite tras ser detido conducindo bébedo, mentres o PP busca os filtradores da denuncia de Ángel Espadas.

BNG e CIG maniféstanse “en defensa do aforro, o emprego e o país” nunha marcha en prol das caixas e contra a “privatización” e “bancarización” de Novacaixagalicia. Celébrase o Debate sobre o Estado da Autonomía no Parlamento Galego. BNG e Esquerda Unida maniféstanse nas distintas localidades galegas en contra da intervención militar da OTAN en Libia e, en consecuencia, o deputado nacionalista representante de Galicia no Congreso dos Deputados, Francisco Jorquera, vota en contra da intervención de España en Libia. Bono permite as linguas autonómicas no Congreso, pero reprende o seu uso. Jorquera fai o principio e o final da súa intervención en galego, e tilda de incogruente que se teñan producido avances no recoñecemento das linguas cooficiais nas institucións europeas “e non se teñan producido avances no Congreso”. BNG pensa que “a ilegalización de Sortu é unha mala noticia para a democracia”.

A UPG queda soa no movemento estudantil, ao crearse a Liga Estudantil Galega, como escisión dos Comités, apoiada entre outros por Isca. Para a Xunta, o coche de Feijóo, de 60.000 euros, non é de gama alta, e resposta ó PSOE acusándoo de ter varios Audis e outros coches sen usar mentres segue a adquirir novos vehículos. Mariano Rajoy fai campaña electoral nun barco dunha familia de narcotraficantes, nunha foto aparecida en Xornal e Público que podería provocarlle problemas. Tensións no seo do PP cos baltaristas.

O BNG acusa a Aznar de “racismo antigalego” por unhas declaracións nas que se refería a Rajoy achacando a súa indecisión “ó seu orixe galego e exercicio galego”, o que recorda ás declaración xa famosas de Rosa Díez.

Dous milleiros de persoas concentránse en Santiago de Compostela para esixirlle ao Goberno da Xunta que non privatice a auga. Os ecoloxistas denuncian como se matan os visóns. “Galiza Non Se Vende” denuncia que os ríos galegos están ameazados por 33 novas minicentrais. Unha reportaxe de Sechu Sende leva á opinión pública o “homeschooling” e o problema de que “ensinar na casa se convirte nun delicto”. Prodúcese unha agresión nun acto de Galicia Bilingüe contra un rapaz que defendía o galego, e a maioría dos medios, incluído Faro de Vigo, silencian a conferencia de Gloria Lago, agora crítica co PP.

Novas da Galiza destaca en marzo o crecemento do tecido asociativo popular, con reportaxe especial para os centros sociais, entre eles a Casa Encantada e Artábria, e fala das irregularidades do “negocio eólico”.

Unha edición especial celebra os 100 números de Novas da Galiza, cun repaso das súas mellores portadas, artigos e informacións.

Abril:
O grupo socialista abandona o concello de Cee como reacción á “Operación Orquestra”. Prepárase a campaña das municipais de maio, e o BNG denuncia o pacto antidemocrático entre PP e PSOE para facer debates ‘a dous’.

A quen non parece afectarlle á súa imaxe en campaña un erro grave é a Mariano Rajoy, quen se deixa fotografar no “Moropa”, un barco do clan de narcotraficantes dos Baúlos, e si a Xornal, que ve marchar o seu director José Luís Gómez por presións do máximo accionista, o construtor Jacinto Rey, que fora presionado á súa vez polo seu amigo Rajoy. Algo que adiantou no seu día GC e logo foi confirmado por Xornal. O feito é silenciado en toda a prensa galega conservadora, mais en GC publícanse as fotos e o vídeo probatorio.

A guerra das fotos segue. O conselleiro de Industria fai honor ao seu apelido e provoca unha guerra de fotografías na Cámara ao mostrar a instantánea de Anxo Quintana no iate do empresario Jacinto Rey para desacreditar o concurso eólico do Parlamento. O presidente da Xunta, pola súa parte, alude ao ex secretario xeral de Relacións Institucionais Antón Losada para contrarrestar as denuncias de manipulación da RG e da TVG por parte do BNG, no que é o único exercizo de “memoria histórica” que parece facer o seu partido nun ano no que desprezaron todos os intentos por facer xustiza ás vítimas do franquismo alegando que "o de atrás procuran sempre esquencelo", contraditoriamente se se ten en conta que non deixan de sacar trapos sucios dos demais.

O BNG denuncia unha “chantaxe” do candidato do PP ao alcalde de Arzúa. PP celebra de forma curiosa e sospeitosa o Día Internacional da Muller: cunha estatua á muller traballadora que a representa dando de comer ás galiñas, xusto no día límite antes da entrada en vigor da nova lei electoral, que prohíbe tal tipo de inauguracións. Beiras volve á área política e intervén nun acto de Mocidade Nacionalista Galega xunto a dirixentes de Nafarroa Bai, Esquerra Republicana e o propio Bloque con declaracións incendiarias como: "Hai peores terroristas que os de ETA e teñen nome e apelidos; Rubalcaba, Rajoy, Fernández Ordóñez e Rouco Varela”. O presidente da Xunta considera estas declaracións unha “equivocación”.

Malia non ter cargo público agora mesmo, o candidato a alcalde do BNG en Compostela, Rubén Cela, súmase aos escasos políticos que fixeron públicos os seus bens. Feijoo defende a “xudicialización da vida política”, e Xosé Luis Barreiro Rivas pon en dúbida a “autonomía de Galicia”. O Xacobeo deixou 400 millóns de euros menos do esperado, segundo un informe. A plataforma Prolingua denuncia a campaña de lanzamento de Marineda City, o centro comercial que se abre preto da Coruña por usar unicamente o castelán nas súas campañas de publicidade.

Celébrase o 50º Aniversario da publicación de “Memorias dun neno labrego”, do gran Xosé Neira Vilas, e recibe unha homenaxe organizada pola Liga Estudantil Galega, no que foi o primeiro gran acto desta formación escindida dos Comités, que abre unhas xornadas adicadas á súa figura con todo tipo de autoridades culturais, e inaugura todo un ano de actos arredor deste libro e o seu autor, como a completa exposición “Querido Balbino”, na biblioteca Ánxel Casal de Santiago.

Novas da Galiza salienta en abril un “novo caso de corrupción do PP”, así como da Casa das Atochas e o seu inminente derrubo, as “prácticas coloniais de Pescanova”, e o “valor reivindicativo da Geraçao à rasca”.

Maio:

Foi o mes da explosión da “indignación”, no que milleiros de persoas saíron ás rúas o 15 de maio, e varios centos acamparon nas prazas das cidades, como no Obradoiro de Santiago, reivindicando unha “Democracia Real Xa!”. Galicia Confidencial xa informou deste fenómeno antes do día 15, a través de distintas reportaxes sobre movementos como Democracia Real Xa ou Xuventude Sen Futuro, Non os votes, e entrevistas aos organizadores das manifestacións. Tamén o 15 de maio son liberados os mariñeiros galegos do Vega 5 e GC afonda na súa liberación.

Carlos Aymerich, líder da corrente Máis Galiza, súmase ao manifesto crítico coa ilegalización de Bildu “Democracia para Euskal Herria”, xunto a outros persoeiros como Beiras, no momento en que o Tribunal Constitucional falla a prol dos nacionalistas vascos. Descúbrense as relacións de Cultura coa trama na Operación Orquesta. Os funcionarios da Xunta mobilízanse contra Feijóo e convocan unha concentración en San Caetano para denunciar a campaña de “desprestixio” do goberno galego contra eles e na que, din, participa La Voz de Galicia. Tamén os “indignados” de Ourense protestan pola “campaña mediática de desprestixio” do movemento 15M por parte deste xornal en Ourense.

O BNG en Crecente accede a revisar o censo electoral e comproba como aparecen varias persoas censadas en vivendas abandonadas. Toda Galicia celebra o Día das Letras Galegas en honor a Lois Pereiro, o autor monfortino de “Poesía Última de Amor e Enfermidade”. Feijóo, durante a súa tradicional ofrenda a Castelao en Bonaval na véspera das Letras Galegas, critica entre liñas a suposta “imposición do galego” durante o bipartito. Un día despois, Queremos Galego celebra as Letras Galegas reivindicando coma sempre o uso do idioma propio fronte aos “ataques” no ensino e demais ámbitos por parte do goberno galego. Un milleiro de persoas reclaman en Compostela que Feijóo “cese nos seus ataques contra o galego” nunha mobilización celebrada de xeito simultáneo en máis de 60 lugares. Jesús Vázquez, conselleiro de Educación, trasládalles o seu “respecto total”, pero aclara que “a promoción da lingua ten que partir da liberdade”.

A Sala Nasa de Santiago anuncia o seu peche cunha “carta de despedida” trala vitoria de Conde Roa, que leva varios anos relacionando os seus xestores co terrorismo. Indignados, feministas e oposición únense contra a Lei de Familia do PP.

É o mes tamén das eleccións municipais, só unha semana despois do 15 de maio, que non inflúe nos resultados, os cales dan a vitoria ao PP, tamén en Galicia. A prensa galega analiza profusamente o novo mapa político xurdido tralo 22M, e Rodri Suárez dá algunhas das claves. Os imputados “populares” na operación “Orquestra” revalidan as súas maiorías. Comezan os movementos despois dos negativos resultados do BNG nas eleccións municipais. O Encontro Irmandiño advirte de que a fronte está “nunha situación límite” e necesita “encetar un novo camiño”. Dous altos cargos do Instituto Galego de Promoción Económica(IGAPE), dependente da Xunta, son detidos por presunta corrupción, xunto ao empresario Jorge Dorribo, no que se chamará “Operación Campión”.

En maio Novas da Galiza fai unha reportaxe sobre a “aposta municipal do soberanismo”, a “escena musical galega”, e o impacto dun campo de golf sobre o medio ambiente coa connivencia da Deputación de Pontevedra e o concello de O Grove.

Xuño:

Pecha Galicia Hoxe, único diario de pago en papel en galego. Os motivos son, segundo a empresa, a crise económica e a política “galegófoba” de Núñez Feijóo, que reduciu drásticamente as subvencións a esta cabeceira, mentres mantía ou aumentaba as axudas a outros, menos críticos co goberno. Remata un “soño”, 18 anos de prensa en Galicia e en galego, cunha liña crítica e comprometida cos intereses de Galicia, e no derradeiro número, un exemplar especial publicado o 28 de xuño, o seu director Caetano Díaz, acusa, nun artigo demoledor, directamente á Xunta de Galicia dun asasinato “a sangue frío”. A repercusión é tamén estatal. Manuel M. Barreiro lanza o primeiro ensaio sobre a era Feijo09, e sostén, entre outras cousas, que teñen que ser os lectores os que sosteñan os medios críticos. Descúbrese como a TVG evita, en maio nos seus servizos informativos, tratar as informacións sobre os “indignados”, as protestas de Queremos Galego durante o día das Letras, ou a operación “Campión”. Foron os propios traballadores os que o denunciaron, a iniciativa do Sindicato de Xornalistas de Galicia.

Os xuíces ratifican a vitoria de Conde Roa despois de ser recurrida por BNG e PSdG. Anúnciase un novo partido “galego e de esquerdas”, impulsado por Filipe Díez, ex militante do BNG e +Galiza, ao calor do 15M. Feijóo “mantén” que os “indignados” abandonen as prazas, afirma mentres os indignados se manifestan fronte á Xunta durante un dos consellos.

A sé do PP en Ordes sofre un atentado cun explosivo que só deixa danos materiais. GC debulla un informe silenciado pola maioría de medios e financiado con cartos públicos que desvela que varias entidades bancarias españolas, entre elas, capital galego, financian mísiles nucleares e demais armas.

Democracia Real Xa e 15M reclama unha “Europa do pobo e non dos mercados” e chama a movilizarse en contra do Pacto do Euro, convocatoria que acada un gran éxito.

Un roteiro de Carlos Callón celebra o Día do Orgullo Gay ensinando os vestixios da homosexualidade no Santiago da Idade Media., como presentación tamén da súa máis recente obra, “Amigos e sodomitas. A configuración da homosexualidade na Idade Media”, premio Vicente Risco de Ensaio.

O Novas da Galiza fala en xuño da “indignaçom dos acampamentos”, o “derrube do PSOE” que “arrasta o nacionalismo”, e a “oposiçom popular á Sogama do Sul”.