Novagalicia Banco prescindirá de 750 empregados e pechará 150 oficinas fóra de Galicia

Novagalicia situou este martes o excedente de persoal en 750 traballadores e elevou a 150 o número de oficinas que pechará na rede de NGBanco, é dicir, fóra de Galicia, Asturias e León, segundo trasladaron os responsables de relacións laborais aos sindicatos.

Na reunión, celebrada en Santiago, os responsables da entidade financeira, que a semana pasada calcularan o excedente nunha galla de entre 600 e 750 empregados, apuntaron que consideran necesarios máis peches de sucursais. Así, as 150 que queren clausurar suporán a baixa de 450 persoas, ás que se suman, polo menos, outras 250 en servizos centrais --están en A Coruña, en Vigo e en Madrid--.

A intención do banco é que as baixas se realicen mediante medidas forzosas --está aberto actualmente un expediente de regulación de emprego (ERE) voluntario--. A proposta pasa por pechar ese ERE ao termo do mes de marzo e presentar un forzoso, no que as indemnizacións serán de 33 días por ano traballado cun tope de 24 mensualidades.

Así mesmo, formulan unha rebaixa salarial de entre o 4% e o 10% aos traballadores con retribucións superiores aos 25.000 euros, eliminar o fondo de pensións que teñen os traballadores máis antigos e eliminar a antigüidade nas pagas extra.

A CIG indicou que os responsables da entidade aseguraron que estas medidas se tomarán aínda que non haxa acordo sindical e atribuíron a determinación ao endurecemento dos requisitos de provisións derivados do real decreto aprobado polo Goberno central.

Os sindicatos manifestaron o seu rexeitamento ás propostas. "Son totalmente inasumibles; é o máis próximo a unha falta de respecto", resumiu José Ramón de Pliego-Valdés, de UGT.

Así, indicou que os representantes sindicais reclamaron a entidade que "reformule o que fai" e busque outras solucións. Así, censurou que os peches de oficinas previstos aumentaran dende a reunión mantida a pasada semana e censurou que a intención do banco é "podar, podar e podar". En calquera caso, reiterou que a súa organización está "aberta a negociar", pero con "documentación e datos".

CONCENTRACIÓNS

O representante de Csica, Juan Bodega, explicou que a reunión deste martes foi "unha primeira toma de contacto" e que, ante as medidas trasladadas pola dirección, os sindicatos tratarán de "buscar solucións" e ver "con qué medidas" responder.

Ademais, esta organización, xunto con CC.OO. e UGT enviará unha circular conxunta para informar o equipo das propostas feitas polo banco.

Novagalicia Banco e os sindicatos teñen previsto manter unha nova reunión o martes da próxima semana. Previamente, o luns 12, CC.OO., UGT e Csica prevén convocar unha protesta para manifestar o seu rexeitamento ás medidas e, dependendo de como se desenvolvan as conversacións, analizarán se organizan máis actos.

Pola súa banda, a CIG ten prevista unha reunión interna este mércores e prevé unha concentración coincidindo coa comparecencia do presidente da Xunta, Alberto Núñez Feijóo, no pleno do próximo día 15.