Hemeroteca web
|
RSS
Xoves 23.05.2013
| Actualizado 12.28
RSS
O alcalde da Illa de Arousa e número tres da lista do PSOE por Pontevedra na últimas eleccións ao Congreso dos Deputados, Manuel Vázquez, declarou que ve "con precaución e cautela" o relevo da actual deputada socialista Carmela Silva. "Cando aceptei ir de número tres na lista sabía que isto podía pasar, polo tanto agora deberei actuar con responsabilidade", comenta o rexedor insular.
Unha responsabilidade que, de momento, e segundo engade Manuel Vázquez, pasa en primeiro lugar por seguir exercendo as súas funcións como alcalde. "Haberá que ir cubrindo etapas. Nestes momentos eu oficialmente só son o alcalde da Illa e niso estou centrado", manifestou en declaracións a Europa Press.
En calquera caso, cando se confirme a renuncia de Carmela Silva como deputada, o alcalde da Illa recoñece que manterá "conversacións internas", tanto co partido coma co seu grupo municipal, para abordar a situación que formula ao abrirse a posibilidade de marchar a Madrid.
Vázquez explicou que, no momento en que teña que acceder á acta de deputado, abandonaría o seu cargo como rexedor do Concello da Illa, cumprindo co criterio ditado pola executiva socialista galega dunha 'persoa, un cargo'.
Aínda que oficialmente rexeita falar dun posible substituto todas as miradas sinalan a Carlos Iglesias cores, de 30 anos, actual concelleiro de Urbanismo e Persoal, que ocupou o número 2 da lista do PSOE desta localidade arousana.
TRANQUILIDADE
O alcalde da Illa asegura que está a asumir a nova situación "con relativa tranquilidade" e que o seu obxectivo, máis alá de ambicións persoais, que xa considera cumpridas, é "buscar a mellor solución para o partido e para a cidadanía que nos votou".
Manuel Vázquez recoñece descoñecer de momento os prazos tanto para que se efectivice a renuncia da actual deputada como para o nomeamento do seu sucesor. "É algo que non me preocupa. Para min xa foi un orgullo que me elixisen como número tres da candidatura. E a partir de agora, como sempre, estarei a disposición do partido", apunta.
