A planta de residuos de O Irixo podería recibir ata 35 millóns en axudas

O director do Instituto Galego de Promoción Económica (Igape), Javier Aguilera, recoñeceu que o proxecto da planta de xestión de residuos de O Irixo (Ourense) podería recibir axudas por parte do organismo económico de ata 35 millóns de euros. Afirmouno entre duras críticas do voceiro do BNG no debate, Fernando Branco, quen acusou á Xunta de "lexislar á medida" de Estela Eólico.

Na Comisión Institucional da Cámara, Aguilera admitiu que o proxecto de O Irixo axústase ás características das axudas convocadas polo Igape para proxectos de investimento empresarial, cofinanciadas co Fondo Europeo de Desenvolvemento Rexional, no marco do Programa Feder Galicia 2007-2013, para a aprobación de apoios específicos ás provincias de Lugo e Ourense.

Así, aínda que destacou que polo momento a Xunta non ten "ningunha proposta formal" da empresa, defendeu que a obriga do Igape é apoiar iniciativas "viables, solventes e que creen emprego". Neste sentido, resaltou que o proxecto de O Irixo é "ambicioso", cunha inversión que supera os 200 millóns de euros e unha previsión de máis de 500 postos de traballo, polo que terán dereito ás axudas vixentes.

Axudar a un proxecto da "envergadura" do de Estela Eólico estará sometido, en calquera caso, a unha serie de condicionantes para a súa aprobación. De feito, Aguilera sinalou que naqueles proxectos que superen os 50 millóns de euros é "preceptiva" a comunicación ás autoridades europeas da concesión da subvención e, se esta fose superior aos 16,87 millóns, sería necesaria a "notificación previa" da CE para autorizar a operación.

Dito isto, fixou o límite de subvención para unha inversión como a da planta de O Irixo nun 15,55 por cento, é dicir, "dun máximo" de 35 millóns de euros. No "hipotético" caso de que a empresa presentase a súa proposta e se lle concedese a axuda, debería ser autorizada polo consello da Xunta e habilitaríanse recursos "especiais", posto que o Igape "non dispón deses fondos".

"TRAXE Á MEDIDA"

Tras a explicación de Aguilera, o nacionalista Fernando Branco acusou á Xunta de "facer un traxe á medida" de Estela Eólico en vez de lexislar "con carácter xenérico" para o conxunto dos galegos e dos proxectos empresariais. Argumentou que tanto esta subvención, como o concurso eólico e a nova lei de industria "favorecen" o proxecto "concreto" de O Irixo.

"Estanlle a achandar o camiño a unha determinada empresa", reprobou Branco, para engadir que "o lóxico" cando un promotor condiciona o seu acceso ao eólico a un plan industrial é que o financie porque se vai beneficiar dos megavatios, e non que se recorra "aos presupostos da Xunta". "Están a lexislar para proxectos concretos", insistiu.
Pola súa banda, Javier Aguilera negou estas acusacións e replicou que o organismo que dirixe ten as "súas portas abertas" a todos os proxectos "viables" que se impulsen na comunidade, con especial interese se se fai nas provincias de Lugo e Ourense. Por último, subliñou que "lle gustaría" que o Igape "non fose criticado" por "apoiar" propostas empresariais "solventes".