A plataforma en defensa dos servizos sociais pide ver a Mato

Membros da plataforma, entregando o escrito no Rexistro da Xunta FOTO: Fernando Blanco

A Plataforma en defensa do sistema público galego de servizos sociais rexistrou onte unha nova solicitude de entrevista coa conselleira de Traballo e Benestar, Beatriz Mato, para abordar o desenvolvemento normativo da Lei de servizos sociais de Galicia que está en vigor dende marzo de 2009.

En rolda de prensa, a plataforma, integrada por 94 entidades de diversa índole -concellos, colectivos sociais, asociacións e federacións veciñais, entre outras-, explicou que onte acudiron ao Rexistro Xeral da Xunta a presentar publicamente unha nova petición de reunión tras a realizada o 3 de marzo.

"Despois de moito tempo de espera, a resposta foi unha esixencia inquisitorial de indicar o nome de todos os compoñentes da plataforma para valorar a posibilidade de recibirnos", sinalaron.

Por iso, onte presentaron a documentación-base da plataforma que reivindica o desenvolvemento normativo da lei de servizos sociais de Galicia, en vigor dende marzo de 2009, e que, indicaron, "presenta neste momento un elevadísimo grao de incumprimento respecto dos prazos que establece a propia norma".

"Con este acto quixemos denunciar a intolerable actitude dunha representante da Administración galega do máximo nivel para coas demandas e iniciativas dun grupo importante de entidades de cidadáns de Galicia", comentaron os representantes da plataforma.