PPdeG pide aos sindicatos "consciencia" da "dramática caída de ingresos" ante a ameaza de folga

O voceiro do Grupo Parlamentario do PPdeG, Pedro Puy, considerou que os sindicatos "deberían ser conscientes" da "difícil situación" económica actual e da "dramática caída de ingresos" da Comunidade autónoma, ao tempo que recordou que "non se tocan aspectos centrais do salario" dos funcionarios.

Díxoo nun escenario en que os sindicatos representantes dos traballadores da función pública ameazan cunha folga ante o decálogo de medidas proposto polo Goberno galego, como non aboar o complemento salarial aos traballadores de baixa os 21 primeiros días.

"Os sindicatos deberían ser conscientes da difícil situación na que estamos, nun proceso de depreciación dos activos monetarios patrimoniais como consecuencia da moeda única e a falta de competitividade da economía española no contexto da Unión Europea", manifestou Pedro Puy preguntado por esta situación na rolda de prensa posterior á Xunta de Portavoces.

O parlamentario do PPdeG subliñou que a tendencia de "contención salarial" que está a haber no ámbito privado e que se traslada á administración público, neste caso, "non está a significar tocar aspectos centrais dos salarios dos funcionarios en Galicia".

Ademais, argumentou que "se está a adaptar a normativa galega" á do conxunto do Estado e á que existe noutras comunidades autónomas.

"XUNTA ESTÁ A DIALOGAR"

Pedro Puy sinalou que o contexto é de "caída drástica dos ingresos", co que se están a xestionar recursos equivalentes ao 2005 ou 2004, con, ademais, entre 14.000 e 15.000 empregados públicos "adicionais".

Por outro lado, remarcou que a Xunta "está a dialogar" en relación ao contido desta normativa galega, pero insistiu en que "a necesidade de axustar o gasto público".