Hemeroteca web | RSS  RSS     Venres 22.03.2019 Actualizado 12:48
El Correo Gallego Radio Obradoiro CorreoTV Anova

Galicia Hoxe

Noticia 1 de 1 Galicia  |   RSS - Galicia RSS

O PPdeG tomba en solitario a lei galega de memoria histórica presentada polo BNG

Os populares acusan de "falsear a historia" aos nacionalistas, que tachan ao PP de "testaferros do legado franquista"

SANTIAGO. EP  | 12.03.2019 
A- A+

O Parlamento galego rexeitou cos votos en contra do Partido Popular de Galicia a admisión a trámite da lei galega de memoria histórica presentada polo BNG, que gozou do respaldo do resto de grupos da oposición --En Marea e PSdeG--.

A toma en consideración pola Cámara da proposta lexislativa do Grupo nacionalista foi debatida no arranque do pleno que desde a mañá deste martes acolle o Pazo do Hórreo. O Grupo Popular fixo valer a súa maioría parlamentaria para tombar a lei do BNG, aos que acusaron de "falsificar a historia" de maneira "permanente" en procura de "réditos electorais".

O deputado do PPdeG Alberto Pazos Couñago censurou a "autoproclamada superioridade moral" que, di, practica o Bloque para "trazar unha raia entre os que son demócratas e os que non o son". "Este grupo non necesita do seu beneplácito para defender a democracia", apostilou o popular, que exhortou a "os que van da man dos herdeiros de Batasuna" a "non atraverse" a "dar leccións" ao PP, en referencia ao BNG e a súa relación con EH-Bildu.

Após a intervención de Pazos Couñago o debate subiu de ton e, durante a quenda de contrarréplica, o deputado Luís Bará foi apercibido polo presidente da Cámara, Miguel Ángel Santalices, despois de que asegurase que o PP opera como "testaferros do legado franquista" e "actuar como aniquiladores, exterminadores e enterradores" da "memoria" das vítimas do réxime.

Estas expresións foron retiradas da orde da sesión por mandato da Presidencia da Cámara. "O meu avó tivo que pasar consulta a punta de pistola", chegou a exclamar Santalices xusto antes de someterse a votación a lei e mentres as bancadas de oposición e grupo de goberno cruzaban acusacións.

Grupo Correo Gallego
Ante calquera dúbida, problema ou comentario nas páxinas de Galicia Hoxe envíe un e-mail a info@galicia-hoxe.com. Titularidade e política de privacidade. Política de Cookies
Auditoría Audiencia Sites
Titulares RSS