O PPdeG ve probada a boa actuación do Goberno en 2002

O portavoz parlamentario do PPdeG, Manuel Ruiz Rivas, atribuíu onte a decisión da xuíza que instrúe a causa do Prestige, Carmen Veiras, de ditar o sobresemento do ex director xeral da Mariña Mercante, José Luís López-Sors, a que "o Goberno actuou como tiña que actuar".

O popular insistiu en que a decisión da maxistrada é a confirmación de que "o Goberno actuou conforme tiña que actuar". Así, celebrou que, a pesar de que "hai moita xente que neste país se dedica a criticar ou intentar influír na Xustiza", esta, co tempo, "acaba pondo a cada un no seu sitio".

Ruiz Rivas recordou como "naqueles tempos -en 2002- houbo unha auténtica caza contra un Goberno", co que "non houbo lealdade de ningún tipo" por parte da oposición, e que estivo a piques de custarlle a presidencia a Manuel Fraga.