Hemeroteca web | RSS  RSS     Domingo 26.04.2020 Actualizado 00:00
El Correo Gallego Radio Obradoiro CorreoTV Anova

Galicia Hoxe

Noticia 1 de 1 Galicia  |   RSS - Galicia RSS

O prezo da vivenda libre sobe en Galicia un 0,7% no terceiro trimestre do ano e un 3,7% interanual

O das novas descende lixeiramente e o das de segunda man sobe un 0,8%

VIGO. EP  | 05.12.2019 
A- A+

O prezo da vivenda libre experimentou en Galicia un ascenso do 0,7 por cento no terceiro trimestre de 2019, mentres que a variación anual descendeu algo máis dun punto e sitúase nun 3,7 por cento.

Así se reflicte nos datos publicados este xoves polo Instituto Nacional de Estatística (INE) sobre o Índice de Prezos da Vivenda con respecto ao terceiro trimestre do ano.

Na comunidade galega, o prezo da vivenda nova descendeu entre xullo e setembro un 0,3%, con respecto ao trimestre anterior, aínda que o prezo é un 6% máis elevado se se ten en conta a variación anual.

Con respecto á vivenda de segunda man, a variación trimestral é positiva, cun incremento de prezos do 0,8 por cento, mentres que o aumento de prezos con respecto ao ano anterior é do 3,3 por cento.

Atendendo a estes datos, Galicia sitúase (xunto a Estremadura, Cantabria, Navarra e outras rexións) entre as comunidades onde a subida de prezos no terceiro trimestre foi máis baixa.

SUBIDA DE PREZOS EN ESPAÑA
O prezo medio da vivenda libre en España subiu un 4,7% interanual no terceiro trimestre do ano, taxa seis décimas inferior á do trimestre anterior e a máis moderada desde o cuarto trimestre de 2016, cando os prezos avanzaron un 4,5%.

Por tipo de vivenda, o prezo medio das de segunda man aumentou un 4,4% interanual no terceiro trimestre, taxa seis décimas inferior á do segundo trimestre e a menor en tres anos.

Nas vivendas novas, o prezo avanzou unha media do 6,6% entre xullo e setembro en valores interanuais, en contraste coa alza do 7,2% que experimentou no segundo trimestre. Neste caso, trátase do menor repunte nun ano, en concreto desde o terceiro trimestre de 2018.

En taxa intertrimestral, o prezo medio da vivenda repuntou un 1,6% entre xullo e setembro, catro décimas máis que no trimestre anterior pero seis menos que en igual período de 2018.

Por tipo de vivenda, os prezos da vivenda nova subiron un 1,5% entre o segundo e o terceiro trimestre deste ano, en contraste co retroceso trimestral do 0,4% rexistrado entre abril e xuño. Pola súa banda, os prezos da vivenda usada incrementáronse un 1,6% no terceiro trimestre, a maior suba trimestral no último ano.

Grupo Correo Gallego
Ante calquera dúbida, problema ou comentario nas páxinas de Galicia Hoxe envíe un e-mail a info@galicia-hoxe.com. Titularidade e política de privacidade. Política de Cookies
Auditoría Audiencia Sites
Titulares RSS