Xoves 09.09.2010
| Actualizado 10.57
Hemeroteca web
|
RSS
RSS
|
Os grupos do PSdeG e BNG déronlle onte luz verde á toma en consideración da Lei de saúde de Galicia, co fin de iniciar o seu trámite parlamentario, co rexeitamento do PPdeG, que considerou "innecesaria" a nova norma porque "reproduce o 90% do articulado da Lei de ordenación sanitaria de Galicia (Losga)", vixente desde 2003.
Así, nacionalistas e socialistas rexeitaron a enmenda á totalidade para a retirada do proxecto de lei presentada polo PPdeG. Neste sentido, a conselleira de Sanidade, María José Rubio, recalcou que coa nova normativa "dáse un salto cualitativo" dunha norma "descritiva" a un texto "garantista". Ademais, a titular de Sanidade manifestou que o proxecto de lei supón a culminación e establecemento das bases de tramitación da sanidade galega. Deste xeito, indicou que o texto supón un "código sanitario e un marco legal estruturalista" no que se integrarán as futuras leis que están en fase de redacción.
Rubio insistiu en que a nova normativa servirá para "fortalecer" o carácter público do sistema sanitario, permitindo alcanzar "maiores cotas de calidade, seguridade e eficiencia nos servizos sanitarios". "Estamos implantando un modelo de atención integral á saúde, garantindo a continuidade de coidados, a universalidade, a equidade e a accesibilidade", afirmou.
Nesa liña, sinalou a necesidade dun novo texto que "superase a fórmula organizativa e funcional da anterior lei". Así, este proxecto de lei introduce o concepto de Sistema de Saúde de Galicia, que substitúe o termo Sistema Sanitario de Galicia, poñendo "o acento na defensa do carácter público".
Entre outros aspectos, a conselleira incidiu na "nova" regulación e ordenación dos empregados públicos da saúde e da docencia e investigación sanitaria.
"Traerá novos conflitos", din os populares
A regulación dos traballadores do sistema sanitario supuxo unha confrontación co portavoz de sanidade do PPdeG, Miguel Santalices, quen asegurou que a nova norma, que cualificou de "chiquilicuatre", "traerá novos conflitos" porque supón "un atentado contra os dereitos do persoal da Administración", ó establecer a súa "mobilidade forzosa". Ademais, afirmou que o proxecto "é innecesario" e "só cambia o e de Lesga polo o de Losga".
"Promover cambios para responder a novos patróns de enfermidades"
A conselleira de Sanidade, María José Rubio, defendeu onte os cambios "estruturais e organizativos" realizados polo Goberno bipartito na área da saúde fronte á "estrutura caduca" deixada polo PPdeG neste ámbito "preparada para o patrón de morbi-mortaldade do século pasado".
Así, na súa comparecencia a petición propia na Cámara galega para informar de actuacións de promoción e protección da saúde, a conselleira sinalou que o Goberno anterior deixou aspectos sen desenvolver como a seguridade alimentaria, polo que a Xunta promove na actualidade "cambios para responder ós novos patróns de enfermidades" coa "axilidade" que requiren as actuacións de promoción e prevención da saúde.
Neste sentido, Rubio recordou que o 80% da mortaldade débese a catro grupos de factores: enfermidades cardiovasculares, cancro (26%), respiratorias e accidentes de tráfico (5%). Por iso, incidiu en que o seu departamento desenvolve "melloras" en materia de recursos humanos, incorporación de nova tecnoloxía, calidade e normativa.
