O Audi A-8 cheo de po nun garaxe da Xunta nunha fotografía difundida polos socialistas FOTO: PSdeG

O Audi A-8 que utilizou Emilio Pérez Touriño co­mo presidente da Xunta pasará á historia da política galega como sím­bolo do desbaldimento que o Partido Popular utilizou co­mo munición na campaña de 2009 para derrocar a coalición de socialistas e nacionalistas que gober­nou Galicia durante catro anos. Naquela campaña, Feijóo denunciou os luxos do Bipartito e ergueu des­pois a bandeira da aus­teridade como icona do seu Goberno.

Pero agora, ás portas doutra campaña, o PSdeG parece decidido a darlles ós populares a mesma medici­na. Os socialistas galegos distribuíron onte a ima­xe doutro Audi A-8. E es­ta vez a súa denuncia é que a Xunta "almacena vehículos nos seus garaxes sen darlles uso, tendo que asumir os custos de mantemen­to e os respectivos segu­ros". O empoado A-8 que difundiu o Grupo Socialis­ta sería un destes vehí­culos en desuso.

"A aparición de vehí­culos de alta gama nos baixos de San Caetano de­mostra a dobre moral do Partido Popular", denunciou onte José Manuel Lage, o mesmo deputado que hai escasos días convocou os medios para denunciar tamén que algúns fun­cionarios cargos de libre designación do Goberno popular facían uso parti­cular de coches do parque móbil da Xunta.

O deputado de Noia, que interpelará ó Goberno sobre esta cuestión no Pleno do Parlamento, ase­gurou ademais que, mentres hai coches dando gasto e sen prestar servizo, "no que vai de lexislatura o Go­berno que preside Alberto Núñez Feijóo gastou máis de dez millóns de euros na adquisición de máis de seiscentos vehícu­los para renovar o parque móbil da Xunta".

Ademais, segundo sinalou Lage, esta actitude "sanguenta" en "tempos de crises" súmase á "utilización fraudulenta" de vehículos da Xunta para "uso privado" levada a cabo por cargos de libre designación do goberno de Feijóo.

Ante estas cuestións, o deputado criticou que "mentres que o presidente da Xunta, Alberto Núñez Feijóo, presume de austeridade", mantén os garaxes "parte da frota de coches sen darlle uso". Así, afirmou que este "é un bo exemplo da dobre moral do Partido Popular", que "comprou máis de 600 coches en menos de dous anos" cun custo "de case 10 millóns de euros", mentres nos garaxes da Xunta "hai vehículos que non se utilizan".

Presidencia nega as acusacións de desbaldimento

Fronte ás reiteradas acusacións de Lage Tuñas, fontes da Conse­llería de Presidencia ne­garon xa noutras ocasións o desbaldimento e sostén que nesta lexislatura o parque de coches oficiais para altos cargos re­duciuse máis dun 40 por cento en relación co do bipartito. Agora son 84, men­tres que os chamados vehí­culos de servizo, 279 máis, emprégaos persoal depen­dente da Xunta "para a realización das tarefas que teñen encomendadas".