O PSdeG ve "unha grande distancia entre os anuncios" de Feijóo sobre Pemex e o emprego no naval

O deputado do PSdeG, José Manuel Lage, observa "unha grande distancia entre os anuncios" do presidente da Xunta, Alberto Núñez Feijóo, sobre futuros contratos da petroleira Pemex a estaleiros galegos e "a realidade" de perda de emprego no sector naval.

"Todos os acordos que sexan beneficiosos para Galicia e para a economía galega sempre contarán co apoio do PSdeG", respondeu Lage a preguntas dos medios acerca da inversión prevista pola empresa mexicana -- de 57 millóns de euros-- para instalar unha planta de hidrocarburos no Porto Exterior de A Coruña.

En rolda de prensa, o voceiro da área institucional do Grupo Parlamentario Socialista, José Manuel Lage, incidiu en que o seu partido "segue esperando dispoñer da documentación" relativa ao acordo asinado entre a paraestatal e a Xunta o pasado maio, que, ademais da inversión concretada este venres, prevé a construción de 14 remolcadores --sete deles na Comunidade Autónoma e outros sete de xeito conxunto--.

Este venres, tras a reunión en que Núñez Feijóo e o director xeral da petroleira, Juan José Suárez Coppel, anunciaron a inversión prevista en Punta Langosteira, o presidente galego mostrouse tamén optimista en relación aos contratos pendentes para a construción de varios buques remolcadores e dous quimiqueros.

Ao respecto, sinalou que "a partir de setembro" se empezarán a formalizar estes contratos "para inmediatamente encher as bancadas" dos estaleiros galegos.