A quen estorba Xosé Manuel Beiras e por que intentan demonizalo agora que o BNG estourou?

O líder do Encontro Irmandiño segue a ser o político máis valorado no nacionalismo e o nacionalista con máis predicamento na sociedade civil galega, nomeadamente entre a mocidade. As sondaxes apuntan a que se algún proxecto político ten posibilidades de callar fóra do búnker upegallo será o que apadriñe o profesor Beiras. El dixo por activa e por pasiva, e segue a dicir, que o nacionalismo precisa de novos liderados, do mesmo xeito que defende manter nos concellos a unidade de acción do Bloque e dos escindidos. Sabe que a travesía do deserto vai ser especialmente dura e que xa hai inimigos exteriores dabondo como para enlearse en pelexas fratricidas estériles. Sen embargo, o clima que se respira non é o máis propicio. A UPG xa activou, agora abertamente, a campaña de demonización do maior referente do nacionalismo galego dende Castelao e, se alguén non o impide, vai negarlles aos irmandiños o pan o o sal, comezando polo intento, esbozado por Guillerme (a secas), de expulsalos das corporacións locais. Parece difícil comezar peor, pero éche o que hai: marchando outra ración de minifundismo mental e de miseria intelectual!