Realidade aumentada, tecnoloxía útil para a información turística

Antonio Fraga, cofundador de Signo, con varios dos membros do equipo da firma na súa sede en Santiago FOTO: H. NEIRA

Signo (www.signo-geo.com) naceu no ano 2003 por iniciativa dos xeógrafos Xaime Garaboa e Antonio Fraga. A empresa botou tres anos no edificio da Fundación Empresa- Universidad Gallega (Feuga) no campus sur compostelán e a partir de aí foi medrando e hoxe ocupa unha oficina na rúa do Hórreo de Santiago, onde realiza labores de consultoría e elaboración de proxectos nos ámbitos de ordenación do territorio e medio natural e desenvolve software para sistemas de información xeográfica.

A maioría do persoal son xeógrafos e entre os seus proxectos máis innovadores figura a creación de software para dispositivos móbiles que aproveitan as vantaxes da tecnoloxía de realidade aumentada, na que "somos unha das primeiras empresas españolas en utilizala", sinala Antonio Fraga, quen apunta entre os primeiros clientes a Turgalicia, a oficina do Xacobeo, Bankinter ou Línea Directa.

Unha das aplicacións que desenvolveron, para a primeira das entidades citadas, permite por exemplo recibir no móbil datos precisos sobre os hoteis e restaurantes máis próximos -a que distancia se encontran, os datos de contacto-, e empregando un compás dixital axuda a dirixirse ó lugar elixido para evitar perderse polo camiño. Este software desenvolveuse para os iPhone de Apple e para os móbiles co sistema operativo Android de Google e as informacións que achega están almacenadas nunha base de datos que se pode actualizar constantemente, de xeito que pode estar tan ó día como queira a entidade para a que se desenvolve a aplicación. En Signo, ademais, elaboraron un xestor de contidos gratuíto que fai posible para as persoas interesadas en crear unha capa de información nova na que sexa quen de sinalar os puntos de interese que considere axeitados.

Promoción do software libre cando é posible

Na empresa compostelá producen así mesmo portais web con funcionalidades de sistemas de información xeográfica, que resultan moi útiles por exemplo para as webs orientadas ó turismo, e empregan para iso o software máis axeitado "en función do que requiran os clientes", apunta Antonio Fraga, quen lembra que o software libre está moi presente nas súas actividades dado que foron unha das empresas fundadoras da Asociación de Empresas Galegas de Software Libre, Agasol.

O cofundador de Signo explica que o sector tecnolóxico non é dos máis afectados pola crise económica, malia que por exemplo a empresa conta entre os seus clientes diferentes administracións, pois entre os proxectos que desenvolven encóntranse plans xerais de ordenación urbanística nos que traballan na parte de sustentabilidade ou as axendas 21 -programas estratéxicos dos concellos-, nas que realizan todos os apartados necesarios.