Hemeroteca web | RSS  RSS     Martes 12.11.2019 Actualizado 23:42
El Correo Gallego Radio Obradoiro CorreoTV Anova

Galicia Hoxe

Noticia 1 de 1 Galicia  |   RSS - Galicia RSS

O sector de software libre arremete contra a Xunta polo seu acordo con Microsoft para as escolas

SANTIAGO. EP  | 26.06.2019 
A- A+

O pasado 10 de xuño a Xunta e Microsoft protagonizaron unha conferencia de prensa para dar a coñecer o convenio que permitirá a implantación da plataforma 'Office 365' nos centros educativos o próximo curso, calculando que chegaría a máis de 280.000 alumnos e 28.000 docentes.

Xunto a esta plataforma, ambas as entidades anunciaron a súa colaboración para completar a formación dos ciclos de Formación Profesional da familia de Informática e Comunicacións pondo ferramentas a disposición dos 27 centros públicos nos que se imparten estes ensinos, como programas e aplicacións, e accións de formación especializada para docentes impartida pola propia Microsoft.

Esta situación xerou a preocupación do sector de empresas galegas de software libre, que non entenden que a Administración cambiase o seu criterio e a súa aposta nos últimos anos por sistemas de código aberto a favor de software privativo, e enmarcan esta nova dinámica nunha planificación que podería "obstaculizar o uso de estándares abertos" na Administración e afectar á formación dos alumnos

A Asociación de Empresas Galegas de Software Libre (Agasol) remitiu un comunicado no que lembran que, a pesar de que a Administración destacou a gratuidade desta implantación, recentemente dedicáronse preto de 13,5 millóns de euros á compra de licenzas de código pechado, polo que insisten en que ambos os movementos "están claramente vinculados desde o punto de vista da planificación".

Agasol advertiu de que esta medida aumentará a "dependencia tecnolóxica" dos futuros profesionais e minguará a súa capacidade adaptación ás ferramentas do mercado, e lamentaron que a formación dos alumnos nestas aplicacións provocará "un efecto contaxio nas empresas TIC galegas". "De feito, reduce a capacitación do alumnado nas destrezas altamente valoradas do tecido empresarial galego en xeral, e do sector TIC en particular", insistiron.

AFECTARÍA O EMPREGO
Outro dos puntos polémicos radica na privacidade dos alumnos. Neste sentido, o colectivo trasladou a súa "preocupación" polo almacenamento ou explotación de datos de perfís persoais dos menores que "poida chegar a facer unha multinacional estranxeira".

O sector sinalou ademais que a desinversión nos servizos de software libre "representan unha degradación da creación de emprego" nas empresas galegas que no futuro poidan contratar a estes futuros profesionais. Por todo iso, instan á Xunta a dar marcha atrás ao acordo subscrito con Microsoft e a reunirse con eles para reforzar a implantación das tecnoloxías "libres" fronte ás privativas.


A Xunta defende que o seu acordo con Microsoft "non vai en detrimento" da súa "aposta" polo software libre

A Xunta defendeu a súa "aposta" polo software libre e o convenio subscrito por Microsoft para a implantación da plataforma 'Office 365' nos centros educativos. Unha decisión criticada pola Asociación de Empresas Galegas de Software Libre, que trasladou a súa preocupación polo recente gasto de 13,5 millóns de euros en licenzas de uso privativo.

A Axencia para a Modernización Tecnolóxica de Galicia quixo responder as denuncias da asociación e argumentou o carácter gratuíto da implantación da plataforma nos centros, ademais do plan de impulso ao software libre iniciado desde 2010 e que vén renovando anualmente.

"O obxectivo do acordo é ampliar o abanico de ferramentas ofimáticas coas que traballan os alumnos dos centros públicos galegos e facilitarlles o uso e acceso a unha plataforma, que poden ter que empregar no seu futuro laboral", sinalou.

Respecto ao uso de licenzas comerciais, Amtega lembrou o proceso de migración progresiva de software libre ata reducir a un 15 por cento o peso dos equipos da Administración que necesitan dese tipo de licenzas e que "permite un aforro de 8,2 millóns de euros" neste ámbito en tres anos.

 

 

Grupo Correo Gallego
Ante calquera dúbida, problema ou comentario nas páxinas de Galicia Hoxe envíe un e-mail a info@galicia-hoxe.com. Titularidade e política de privacidade. Política de Cookies
Auditoría Audiencia Sites
Titulares RSS