Seguros a 50 metros?

As lapas ameazan as vivendas da parroquia do Romaño, en Santiago, na onda de incendios de 2006 FOTO: RAMÓN ESCUREDO

Establecer unha franxa de seguridade de cen metros limpa de matogueira e masa forestal para protexer as vivendas dos incendios forestais foi unha das consecuencias da onda de 2006, cando o lume se achegou perigosamente ás portas de varios núcleos de poboación. Agora, o Goberno de Alberto Núñez Feijóo decidiu, baseándose na experiencia dos últimos anos, que non é necesaria tanta distancia e a rebaixa á metade, cincuenta metros, no anteproxecto de lei de montes que o conselleiro de Medio Rural, Samuel Juárez presentou onte no Consello. A norma rebaixa tamén de 50 a 30 metros a outra marxe establecida para que permaneza libre de especies especialmente combustibles, como poden ser o piñeiro, a acacia ou a mimosa.

Na roda de prensa posterior ó Consello da Xunta, Juárez explicou que a lei intentará tamén equilibrar as responsabilidades na xestión das franxas de seguridade, como resposta ós múltiples conflitos entre os propietarios do monte e das vivendas á hora de definir cal dos dous debe facerse cargo da limpeza nos núcleos illados e as instalacións construídas sen licenza. Neses casos, a Administración optou por facilitar que o propietario do monte, obrigado a manter a franxa de seguridade, poida reclamarlles unha compensación ós propietarios das vivendas. Para os casos de nova construción en zonas de influencia forestal será obrigatoria a franxa perimetral dos 30 metros ao redor da edificación ou da instalación. Para os casos en que a franxa de seguridade non teña donos coñecidos, a lei prevé que a xestión da superficie se decida por acordo entre a Xunta e o concello

O presidente Feijóo presentou "a primeira Lei de montes desde que temos Estatuto" como a norma destinada a insistir na concienciación social, loitar contra o minifundismo e regular os usos forestais para frear o abandono do monte.

1,2 millóns de hectáresa en mans de 600.000 donos

A estratexia diríxese cara ás 1.200.000 hectáreas de monte galego que se reparten en 600.000 títulos de propiedade, un panorama o suficientemente fraccionado para que o Goberno galego se expuxo como un "obxectivo difícil e inaprazable" a agrupación das superficies para mellorar a súa explotación.

Unha das medidas coas que a lei pretende frear o minifundismo será a prohibición de segregar parcelas con superficies inferiores a quince hectáreas. A efectos de poder obter axudas públicas, aplicarase a mesma limitación de superficie nos casos de concentración parcelaria.

Dúas terceiras partes da superficie de Galicia corresponden a terreos forestais onde a arborada ocupa o 48% de todo o territorio. Sacar un maior rendemento dese patrimonio, do que se obtén anualmente máis de sete millóns de metros cúbicos de madeira -a mesma cantidade que produce todo o Reino Unido ou Italia e Bélxica xuntos- forma parte dos obxectivos que a Consellería de Medio Rural trasladou á Lei de Montes. O texto que o conselleiro Samuel Juárez levou onte establecerá a obriga de reinvestir o 40% dos aproveitamentos que se obteñan da superficie forestal, unha porcentaxe que chega ata o 100% cando se trate de superficies que sexan arrasadas polos incendios. Ademais, neste último caso, a lei prevé que non se poida producir un cambio de uso durante un período de 30 anos. Para as repoboacións, a lei de montes que a Xunta remitirá á Cámara establece a prohibición expresa de recorrer ó eucalipto só para aquelas zonas nas que exista forestación de crecemento lento, un total de 23 especies de coníferas frondosas que aparecerán detalladas nun anexo da lei.Por primeira vez regularase unha distancia mínima que deberán cumprir as reforestacións que se realicen a partir da decatada en vigor da lei con respecto doutro tipo de cultivos.

Pendente de ser discutido aínda co sector, e texto que onte deu a coñecer o conselleiro de Medio Rural distinguirá os aproveitamentos forestais distinguindo entre os madeirables e non madeirables, prestando unha especial atención, pola súa incidencia económica e ambiental, os cinexéticos e ós de pastoreo.