Os socialistas agoiran unha forte caída da economía galega polos recortes

O secretario xeral do PSdeG, Pachi Vázquez, esixiu a comparecencia do presidente da Xunta, Alberto Núñez Feijóo, no Parlamento galego para que "dea a cara" polos efectos que terán os recortes anunciado polo líder do Executivo central, Mariano Rajoy. Segundo denuncia, suporán 1.625 millóns menos para Galicia, un descenso do 15 por cento dos orzamentos galegos e unha caída do 5 por cento do PIB autonómico.

En rolda de prensa, Pachi Vázquez --acompañado do portavoz parlamentario, Abel Losada-- presentou a petición de comparecencia, que definiu como "a máis importante"  da lexislatura e do Parlamento autonómico. De feito, preguntouse "para que vale o Parlamento" se non comparece ante os deputados galegos o presidente da Xunta "no momento máis difícil da democracia".

Así, Vázquez acusou a Núñez Feijóo de "escapar a unha xira electoral para recadar votos" coa súa viaxe por Sudamérica que comeza este venres, no canto de dar explicacións aos cidadáns.