SOS dende a terra chá

Veciños da Terra Chá manifestándose contra a mina de seixo de Erimsa nunha mobilización do 2007 FOTO: ANGAR

Unha das comarcas rurais por excelencia de Galicia volve ver ameazado o seu motor económico: o agrogandeiro. Oito anos despois de que a multinacional Erimsa solicitase explotar os ricos xacementos de seixo existentes na Terra Chá, o inicio da actividade mineira está máis preto que nunca, cun cambio de lexislación que lle abre á porta ó labor extractivo en solo rústico. Un total de 1.147 explotacións e máis de 25.000 cabezas de vacún veranse afectadas directamente polas tres minas de seixo, que se estenden ó longo de 5.700 hectáreas polos concellos da Pastoriza, Cospeito, Castro de Rei, Abadín, Vilalba e Riotorto.

A pesar de que Erimsa xa obttivo a concesión das explotacións en 2007 -por un período de 30 anos prorrogable ata os 90-, a lexislación prohibía a actividade extractiva en sólo rústico de protección agropecuaria, unha restricción que afectaba case ó 100% do chan incluído no proxecto extractivo. Esta salvagarda para os produtores da zona estivo a piques de ser abolida ese mesmo ano coa modificación da Lei de Minería de Galicia, que avogaba porque a actividade extractiva en solo rústico pasase a estar permitida con licenza municipal. Non obstante, a presión social impediu que a iniciativa prosperase, manténdose a prohibición ata o 31 de marzo pasado, cando o DOG publicou a reforma do Lei do Solo, pola que é posible de-senvolver esta actividade con autorización da Xunta.

Este novo escenario levou os veciños da Terra Chá a poñerse de novo en pé de guerra, denunciando o grave impacto que a industria mineira tería sobre a economía local da zona e sobre o medio. "A Terra Chá non é un deserto, nin unha comarca deshabitada. É das poucas zonas de Galiza nas que aínda se mantén un número importante de explotacións gandeiras, que ademais son o motor económico destes concellos, e que impide a despoboación do rural", apunta Margarida Prieto, responsable do Sindicato Labrego Galego (SLG) na comarca lucense. Xunto co impacto directo a un bo número de explotacións, Prieto destaca que a actividade mineira leva a un descenso do nivel do terreo -mínimo de 10 centímetros-, ademais de acabar co croio que actúa de drenaxe e conserva a humidade que fai fértiles ás terras da comarca. "Os terreos que agora permanecen inundados dous meses, anegaranse todo o ano como consecuencia do descenso do nivel do solo e de remover a capa orgánica, deixando infértiles as terras durante 12 anos", din dende o SLG.

Pídenlle á Xunta informes do impacto sobre o agro

Á espera de que se resolvan os contenciosos interpostos pola concesión das licenzas a Erimsa, a Comisión de Asociacións en contra das minas da Terra Chá tratará de evitar que a Xunta lle dea luz verde ó último trámite que lle falta á empresa para iniciar a actividade. Para iso, esixen informes de Medio Rural nos que se avalía o impacto que a minería terá sobre a actividade agrogandeira, así como da Confederación Hidrográfica e de Medio Ambiente, xa que boa parte da zona afectada está protexida pola Rede Natura e integrada nun LIC. A loita pasa tamén por activar unha vez máis á masa cidadá, que tras a vitoria en 2007, vivía tranquila traballando as súas terras.