Teresa Táboas deixa o escano no Parlamento por diferencias coa liña política do BNG

Teresa Táboas

Teresa Táboas, deputada do BNG na Cámara galega e exconselleira de Vivenda no Goberno bipartito que presidiu Emilio Pérez Touriño, renunciou ao seu escano no Parlamento. Esta decisión xa lla comunicou ao portavoz da formación nacionalista, Guillerme Vázquez, aludindo a motivos por unha banda persoais e outros de índole política.

En relación ao ámbito político, Táboas lembroulle a Vázquez a súa defensa da necesidade de rexenerar e refundar o proxecto político do BNG, aínda que a militancia decidiu, "con incuestionable lexitimidade democrático", que non era preciso.

Finalmente, Teresa Táboas apela á honestidade e a coherencia para anunciar que é mellor que outra persoa máis identificada coa liña marcada pola última asemblea do BNG, ocupe o seu posto no Parlamento.

Estes días post-asemblea, tanto a corrente liderada por Xosé Manuel Beiras, Encontro Irmandiño, como a formación aliada +Galiza, dirixida por Carlos Aymerich, están a realizar análises que se plasmarán nunha reunión para decidir se permanecen no BNG ou se separan, até o punto de que se pospuxeron as designacións de responsables de área na formación nacionalista ata que as cousas estean máis claras.

Todo fai pensar que Teresa Táboas consolide a súa participación e compromiso na corrente liderada por Beiras, Encontro Irmandiño, á que se achegou explicitamente antes da asemblea de BNG e despois de deixar +Galiza.