Tesoirazo en infraestruturas, cultura e economía, e axuste en sanidade e educación

As consellerías que máis reducirán os seus presupostos, en termos   relativos, co recorte anunciado pola Xunta derivado "dos   incumprimentos" do sistema de financiamento autonómico serán as de   Medio Ambiente, Territorio e Infraestruturas (un 5,6% de rebaixa e   30,6 millóns menos), Cultura e Turismo (5,3% e 7 millóns menos) e   Economía e Industria (4,2% e 11 millóns menos), co fin de que o   Executivo galego poida "pagar as facturas e preservar o gasto   social", que se verá reducido nun 0,4%.  
   Así o indicou en rolda de prensa a conselleira de Facenda, Marta   Fernández Currás, quen recordou o anuncio, feito polo presidente,   Alberto Núñez Feijóo, de que a Xunta reducirá o gasto en 129 millóns   de euros e se endebedará por outros 114 (que non computan no déficit)   para afrontar a negativa do Goberno central de transferir este   exercicio os 243 millóns de euros do Fondo de Cooperación.  
   Fernández Currás explicou que o axuste será finalmente de 103,5   millóns, mentres que 25,5 rebaixaranse ao peche do exercicio ben con   maiores ingresos, ben con aforros en partidas que non se poidan   executar.  
   Agora os departamentos de Sanidade, Educación e Benestar   (integrado na Consellería de Traballo) sufrirán un recorte do 0,4%,   que se acometerá atrasando obras de mellora e reparación e   reformulando partidas de axudas públicas que non teñen a demanda   esperada. En concreto, a área sanitaria perde 14,2 millóns; a   educativa, 8,7; e a de Traballo e Benestar, 17,8 millóns.  
   A titular de Facenda defendeu que a Xunta foi "responsable" ao   incluír o Fondo de Cooperación nos presupostos de 2011 da Comunidade   galega, posto que son partidas que "chegaron" en 2009 e 2010 e o   Ministerio de Economía e Facenda "estivo preto de reconsiderar esta   postura" de non facer o ingreso ata 2013. Non foi ata o Consello de   Política Fiscal e Financeira do pasado xullo que se confirmou que   este diñeiro non sería transferido, argumentou.  
   Así, a conselleira indicou que, de dispoñer do Fondo de   Cooperación, o déficit acumulado por Galicia no primeiro semestre   sería do 0,58%, en lugar do 0,92% que figura nos cálculos do   ministerio. Ademais, reiterou que antes de fin de mes estará   presentado o recurso de inconstitucionalidade para reclamar ao   Goberno central 805 millóns do sistema de financiamento.  
   O recorte representa o 1,2% do presuposto galego, que acumula un   descenso do 11,8% en relación a 2010. A rebaixa total é de 1.280   millóns de euros e deixa as contas da comunidade en cifras similares   ás de 2006. En calquera caso, a titular de Facenda defendeu que o   axuste presupostario se fixo "blindando os servizos públicos   fundamentais" e apuntou que as áreas de sanidade, educación e   benestar caen un 0,4%, fronte ao 3% do resto de departamentos.   

AREAS AFECTADAS  
   Ademais dos recortes mencionados, cae un 2% o presuposto dos   órganos que dependen do presidente da Xunta (4,5 millóns menos); un   0,9% os fondos para a Consellería de Presidencia (1,8 millóns); un   1,1% os de Facenda (0,6 millóns); un 0,9% os de Medio Rural (4,7   millóns), un 1,3% os de Mar (2,3 millóns) e un 0,6% os gastos de   diversas consellerías (0,3 millóns).  
   Fernández Currás dixo que en Educación non se verán afectados os   programas de transporte escolar, comedores ou gratuidade de libros de   texto, así como o decreto do pluriling~ísmo, o plan de formación do   profesorado, ou a consolidación das unidades de investigación das   universidades galegas.  
   En Sanidade "están garantidas" as partidas de receita   farmacéutica, os programas de vacinación, os de saúde mental, a   coordinación de transplantes e os equipamentos de atención primaria.   Dentro deste departamento, os axustes afectarán aos servizos que   achegan menos valor e a investimentos que non fosen iniciados.  
   Pola súa banda, en Benestar "blíndanse" o complemento das pensións   non contributivas, a atención á dependencia, as escolas de cero a   tres anos, a renda de inserción social, a axuda por fillo a cargo, as   transferencias a concellos para centros de días e axudas de coidador   e as subvencións a asociacións de minusválidos.   

PRIORIDADE A OBRAS PROPIAS  
   A consellería cun maior axuste, a dirixida por Agustín Hernández,   preservará a seguridade vial, as actuacións ambientais, os plans   urbanísticos e a supresión de peaxes. Ademais, darase prioridade ás   obras de titularidade propia e atrasaranse as que non fosen   licitadas.  
   Entre os ingresos que espera obter o Executivo galego de aquí ao   fin de ano están os procedentes polo novo imposto sobre o xogo   online, para o que Facenda aínda non ten unha estimación, dado que   está á espera da información que achegue o Ministerio de Economía.