Unha vez máis o doutor en Teoloxía e Filosofía, Andrés Torres Queiruga sufriu nas súas carnes o celo inquisidor da Igrexa católica. Esta vez en Bilbao e polo bispo de Bilbao, Mario Iceta. “Deus Bo nun mundo inxusto”, a conferencia que Torres Queiruga pensaba pronunciar no Instituto Diocesano de Teoloxía e Pastoral de Bilbao (IDTP), foi inicialmente censurada por Monseñor Iceta, Bispo de Bilbao fiel ás ideoloxías conservadoras, clara aposta de Rouco no corazón de Euskadi, membro da Curia máis reaccionaria e ultra da Igrexa Vasca e simpatizante do Opus Dei.

Ao final parece que, logo de diversas negociacións permitirase ao teólogo galego intervir no IDTP baixo certas condicións. Condicións que nin os negociadores nin o propio Torres Queiruga fixeron públicas.

Coñecido é que o prestixioso e acreditado profesor segue sendo considerado como un teólogo incómodo, defensor dunha Igrexa democrática e dun pluralismo relixioso que rompe coa ríxida ortodoxia oficial, estreita e dogmática, da Igrexa actual. Con todo, Torres Queiruga, consciente da deriva conservadora da Igrexa e, a pesar das constantes censuras e críticas que nestes últimos tempos está recibindo, non abandona a prudencia, a benevolencia, a serenidade, a humildade e o compromiso relixioso e social que lle caracterizou sempre. Non sae nin sairá da súa boca unha palabra negativa fronte ao descaro inxusto co que se lle trata. É a diferenza entre un home que fai da tolerancia o principio fundamental da súa vida persoal, profesional e relixiosa e unha institución de peite e mantilla, anacrónica, déspota e insolente.

Alá eles! Pero cando rexorde a exaltación da intolerancia relixiosa en doses tan elevadas, calquera censurado pode converterse con facilidade en acosado e perseguido. E iso si que non me fai ningunha graza. Ningunha.