Traballadores de Navantia volverán mobilizarse o próximo martes, día 26

Os traballadores directos e auxiliares de Navantia Fene-Ferrol realizarán novas mobilizacións de protesta, para reclamar ocupación e compromisos concretos por parte das administracións, e manteñen a cautela ante o anuncio realizado polo presidente da Xunta, Alberto Núñez Feijóo, de que o Goberno mexicano pedirá un presuposto á empresa naval pública española para a construción de buques quimiqueros.

Os traballadores aprobaron o novo calendario de mobilizacións nunha asemblea realizada na mañá deste mércores. Inclúese unha nova mobilización de protesta que terá lugar o martes 26 de xuño, na que participarán os operarios das plantas de Ferrol e Fene.

A segunda acción que se desenvolverá terá lugar o 4 de xullo. Coincidirá coa botadura do segundo dos dous buques que Navantia constrúe para a armada australiana, o 'LHD Adelaide'. Ignacio Naveiras, voceiro do comité, sinalou que a botadura será un "fito" na construción naval da bisbarra e servirá para demostrar que os traballadores "cumpren coa súa obriga", polo que esixirán ás administracións que respondan tamén dos compromisos adquiridos co sector e co seu futuro.

O calendario de mobilizacións aprobouse no día despois do anuncio realizado por Feijóo de que a petroleira mexicana Pemex, a través da Armada do país, solicitará presuposto a Navantia para a construción de buques quimiqueros.

O comité de empresa recibiu o anuncio con cautela. Así, Naveiras indicou que se trata dunha acción comercial máis das que desenvolve Navantia e que aínda que "é benvida", porque a construción de quimiqueros se podería adaptar á actividade dos estaleiros da Ría de Ferrol, de momento, "non pasa de aí".

Para Naveiras, "o anuncio vén dun descoñecemento do sector porque o único que serve alimentar estas posibilidades mediáticamente é para que entren en concurso outros competidores". Nesta liña, pediu que o apoio institucional que realice o Partido Popular o faga da man de Navantia, por ser quen ten coñecemento das instalacións, as súas capacidades e "os mellores momentos ou produtos que se poden desenvolver".