Hemeroteca web | RSS  RSS     Luns 23.04.2018 Actualizado 13:56
El Correo Gallego Radio Obradoiro CorreoTV Anova multiconsulting

Galicia Hoxe

Noticia 1 de 1 Galicia  |   RSS - Galicia RSS

Traballadores de Maderas Iglesias loitan pola continuidade da empresa

Pídenlle á Xunta e a grupos parlamentarios que a defendan

SANTIAGO. EP  | 28.12.2017 
A- A+

Traballadores de Maderas Iglesias reuníronse este xoves cos grupos parlamentarios e coa Xunta para pedirlles medidas para defender a continuidade desta empresa do Porriño (Pontevedra) dedicada á fabricación de tarima flotante e na que traballan unhas 250 persoas, na súa maioría mulleres.

En declaracións aos medios, o presidente do comité de empresa, Víctor Morales explicou que a situación actual da entidade, que "chegou a ser unha multinacional", débese á "mala xestión" dos seus responsables que "mesmo non souberon aproveitar un repunte que houbo en 2015, cando se contrataron a unhas 200 persoas máis".

A pesar de que hai "clientes e mercado", Morales sinalou que o próximo día 12 os traballadores e a dirección empezarán unha negociación para a liquidación de 140 empregados. "A empresa dános até o día 30 para tentar chegar a un acordo e senón di que o 25 de febreiro pecha", lamentou.

Con todo, asegurou que a dirección non dá garantías de pago da liquidación aos traballadores que se acollan a este expediente de regulación de emprego (ERE) que, segundo indicou, afectaría na súa maioría a mulleres, que compoñen case o total do cadro.

Por todo iso, os traballadores, acompañados por un grupo de alcaldes das comarcas da Louriña e de O Condado, pediron ao catro grupos da Cámara galega que poñan en marcha medidas para "salvar á empresa" e que se poida dar continuidade ao emprego.

"Tentamos salvar á empresa, queremos seguir traballando, a maioría somos mulleres e dunha idade moi crítica, 55 ou 56 anos", manifestou unha dos traballadores, Enriqueta García, que pide un "compromiso político" para evitar o peche da empresa.

REUNIÓN CO IGAPE
Após concentrarse ás portas do Parlamento de Galicia e manter unha reunión con representantes de PPdeG, En Marea, PSdeG e BNG, os traballadores desprazáronse até a sede do Instituto Galego de Promoción Económica (Igape) en San Lázaro, co obxectivo de pedirlle á Xunta que "aclare cal é a situación real da empresa".

"Sabemos o que nos di o empresario", sinalou Molares, que mostrou o seu desexo de que o Igape poida intervir para "solucionar" o conflito e "salvar á empresa".

Grupo Correo Gallego
Ante calquera dúbida, problema ou comentario nas páxinas de Galicia Hoxe envíe un e-mail a info@galicia-hoxe.com. Titularidade e política de privacidade. Política de Cookies
Auditoría Audiencia Sites
Titulares RSS