Hemeroteca web | RSS  RSS     Luns 09.12.2019 Actualizado 13:50
El Correo Gallego Radio Obradoiro CorreoTV Anova

Galicia Hoxe

Noticia 1 de 1 Galicia  |   RSS - Galicia RSS

O TSXG desestima o recurso da Xunta contra a suspensión da modificación do parque eólico do Oribio

A Plataforma Salvemos O Iribio insta á Fiscalía a actuar "con valentía" e incoar de oficio dilixencias penais

SANTIAGO. EP  | 21.11.2019 
A- A+

O Tribunal Superior de Xustiza de Galicia (TSXG) desestimou o recurso da Consellería de Industria contra a resolución pola que se suspendeu provisionalmente o acordo aprobado polo Consello da Xunta --do 27 de xuño de 2019-- para a modificación do proxecto do parque eólico Serra do Oribio, zona especial de conservación (ZEC) Os Ancares-Courel, en Lugo.

Nun auto con data do 20 de novembro, ao que tivo acceso Europa Press, desestímase o recurso de reposición da Xunta pola resolución do TSXG do 16 de outubro --que deu a razón á Asociación Petón do Lobo--. Ademais, infórmase de que contra esta resolución non cabe recurso.

O alto tribunal galego suspendeu en outubro o acordo e as súas disposicións normativas "mentres non se actualice a declaración de impacto ambiental (DIA) do ano 2005 e se xustifique a prevalencia do uso industrial que afecta a valores ambientais, paisaxísticos, forestais e culturais".

O fallo subliñaba que, desde a DIA de 2005, "evidentemente, cambiaron as circunstancias tecnolóxicas, enerxéticas e ambientais e aprobouse o Plan Director da Rede Natura 2000 en Galicia que, entre outras medidas, prohíbe a instalación de novos parques eólicos nos espazos da Rede".

Incide, así mesmo, en que a Serra do Oribio está catalogada como ZEC (zona especial de conservación) Os Ancares-Courel, Rede Natura 2000, así como ZEPVN (zona de especial protección dos valores naturais), con "destacada riqueza en valores etnográficos e culturais", pois por alí discorre o Camiño de Santiago.

SALVEMOS O IRIBIO PIDE Á FISCALÍA ACTUAR
Pola súa banda, a Plataforma Salvemos O Iribio e a Rede de Plataformas Non Eólicos emitiron un comunicado após coñecerse a decisión para instar á Fiscalía a actuar "con valentía" e incoar de oficio dilixencias penais.

"En calquera outro país da nosa contorna tanto os responsables da Xunta de Galicia como da empresa promotora estarían agora rendendo contas ante a Xustiza por un posible delito contra o medio ambiente e os recursos naturais", sosteñen.

Así, estas entidades sinalan que o TSXG "confirma" que o proxecto de Fergo Galicia Vento "obvia": a normativa vixente coa implantación de novos aeroxeradores en Rede Natura, que o modificado do proxecto necesita dunha adecuada avaliación ambiental, que a área está incluída no Catálogo das Paisaxes de Galicia e que o proxecto "implica unha transformación urbanística non amparada legalmente", entre outras cuestións.

UN PARQUE "AUTORIZADO POLO BIPARTITO"
O presidente da Xunta, Alberto Núñez Feijóo, foi preguntado polo fallo na rolda de prensa posterior á reunión semanal do seu Executivo, na que asegurou non coñecer a sentenza. "Cando teñamos formada opinión, diremos o que imos facer", recalcou.

Feijóo explicou que, sen coñecer a decisión xudicial, non pode anticipar a proposta de actuación que fará a Consellería de Industria "desde o punto de vista das súas competencias" e engadiu que a cuestión terá que ser analizada tamén pola Asesoría Xurídica.

En todo caso, como sempre que se lle cuestionou sobre este caso, remarcou que se trata dun parque eólico aprobado polo Goberno bipartito, co que o seu Executivo --defende-- continuou porque estaba tramitado anteriormente.

Grupo Correo Gallego
Ante calquera dúbida, problema ou comentario nas páxinas de Galicia Hoxe envíe un e-mail a info@galicia-hoxe.com. Titularidade e política de privacidade. Política de Cookies
Auditoría Audiencia Sites
Titulares RSS