UGT en Novagalicia propón que ningún salario supere os 100.000 euros

A sección sindical de UGT en Novagalicia Banco propuxo que ningún salario supere os 100.000 euros na entidade, na que 127 persoas teñen un salario anual por enriba de 90.000 euros, segundo indican nun escrito.

UGT argumenta que a súa intención é "adiantar posibles medidas máis beneficiosas para o equipo e máis rendibles para a entidade", en previsión das condicións que imporá a Unión Europea para acceder ao rescate bancario.

Así, o sindicato pide fixar "unha política de retribucións xustas e coherentes" e sinala que, con motivo da fusión déronse "bastantes disfuncións". "Consideramos que xa é hora de arranxar este problema", agrega UGT, que destaca que "os responsables da situación das dúas caixas --Caixa Galicia e Caixanova--" continúan "con niveis salariais desproporcionados e, o que é peor, en postos de responsabilidade".