Hemeroteca web | RSS  RSS     Domingo 26.04.2020 Actualizado 00:00
El Correo Gallego Radio Obradoiro CorreoTV Anova

Galicia Hoxe

Noticia 1 de 1 Galicia  |   RSS - Galicia RSS

A Xunta compra 1.000 computadores para que alumnos de "familias con menos recursos" sigan as clases 'online'

Feijóo rexeita estimar cando se reabrirán as aulas: "Non creo que sexa o momento de pór datas, e para volver ao colexio tampouco"

SANTIAGO. EP  | 28.03.2020 
A- A+

O Goberno galego comprou 1.000 computadores que destinará a aqueles alumnos de familias "con menos recursos" para que poidan seguir as clases de forma 'online'. Estes equipos, que recibirán a través dos seus centros educativos, contarán con conexión a Internet gratuíta.

Na rolda de prensa telemática ofrecida este venres tras a reunión do seu Executivo, o presidente da Xunta, Alberto Núñez Feijóo, avanzou tamén que se habilitará para máis de 33.000 docentes do sistema público unha plataforma de videoconferencias, coa que poderán interactuar cos estudantes e "impartir as clases en tempo real", e unha guía para a teleformación.

Así mesmo, os recursos dixitais da plataforma 'E-Dixgal' estarán "abertos para toda a comunidade educativa", o que implica uns 95.000 alumnos de 5º e 6º de Primaria e de 1º e 2º de Secundaria. Antes, explicou Feijóo, só estaban dispoñibles para alumnos que tiñan "computadores financiados con fondos públicos".

A iso hai que sumar que se habilitarán videotutoriais que explicarán o emprego destas aplicacións e que as familias disporán dun 'servizo premium' para resolver dúbidas sobre o servizo gratuíto de Internet do que dispoñen os computadores, que é froito dunha colaboración cos operadores Orange, Vodafone e R.

En canto á Formación Profesional, Feijóo destacou que os profesores poderán apoiarse en materiais didácticos procedentes dun banco de contidos elaborados por docentes nos último oito anos de "60 ciclos de diferentes e 140 módulos profesionais". En total, "máis de 21.000 horas de formación curricular", engadiu.

Nesta mesma liña, abriranse todos os materiais que se utilizan na FP a distancia na Comunidade galega, o que inclúe 34 ciclos diferentes con 272 módulos e máis de 37.000 horas en total.

O presidente da Xunta tamén valorou que, como consecuencia do confinamento derivado do estado de alarma, na última semana multiplicouse por 3,4 --até unha media de 1.074-- a cifra de profesores creadores de contidos que acceden diariamente aos portais educativos dos centros.

Así mesmo, Feijóo subliñou que nos sete días pasados subiron até a media de 39.447 as persoas conectadas ás aulas virtuais, "máis do dobre" que en semanas previas, e que o obxectivo das medidas aprobadas este venres en Consello é "ampliar o ensino desde as casas".

NON PON DATA PARA VOLVER A CLASE
Preguntado sobre a posibilidade de volver ás clases para finalizar o curso escolar, o titular do Goberno galego respondeu: "Non creo que sexa o momento de pór datas e moito menos datas certas, e para volver ao colexio tampouco".

Neste sentido, dixo estar "sorprendido" por que a ministra de Educación, Isabel Celaá, confiase este xoves en que os estudantes poderían volver aos centros "aínda que sexan 15 días", xa que na videoconferencia que mantivo o mércores a ministra cos conselleiros de Educación das comunidades "non se abordou a volta ás aulas", afirmou Feijóo.

"Calquera data certa que deamos hoxe poderá converterse en data incerta nunha semana", engadiu a continuación.

AXUDAS COMEDOR
Por outra banda, o Goberno galego aprobou a continuación das axudas de comedores escolares aínda que estean suspendidas as clases. Así, Feijóo explicou que a Xunta seguirá aboando os menús "de todos os días lectivos a aquelas familias beneficiarias" deste programa.

En concreto, recibirán 2,5 euros ao día os 40.480 alumnos con comedor gratuíto e 1,5 euros os 3.813 que o teñen semigratuito, é dicir, que pagan 1 euro por xornada.

Estas axudas tamén chegarán ás 6.000 familias con fillos nas gardarías da Xunta --de primeiro ciclo de Infantil, de 0 a 3 anos-- que ou ben non pagan nada ou ben pagan 27 euros ou menos ao mes polo comedor nestes centros.

Ademais, Feijóo advertiu que os beneficiarios destas axudas poderán presentar a súa solicitude a través da sede electrónica da Administración desde que a orde se publique no Diario Oficial de Galicia (DOG) e até o vindeiro luns 6 de abril.

Grupo Correo Gallego
Ante calquera dúbida, problema ou comentario nas páxinas de Galicia Hoxe envíe un e-mail a info@galicia-hoxe.com. Titularidade e política de privacidade. Política de Cookies
Auditoría Audiencia Sites
Titulares RSS