Hemeroteca web | RSS  RSS     Martes 19.06.2018 Actualizado 20:48
El Correo Gallego Radio Obradoiro CorreoTV Anova

Galicia Hoxe

Noticia 1 de 1 Galicia  |   RSS - Galicia RSS

A Xunta convoca oposicións para cubrir 614 prazas en distintas áreas, o 40% delas de libre acceso

Hai 76 prazas camareiro e axudante de cociña, 121 para persoal de consellerías e 51 de alta especialización, entre outras

SANTIAGO. EP  | 07.03.2018 
A- A+

A Xunta convocará entre este mércores e xoves 18 oposicións para cubrir un total de 614 prazas de emprego público en distintas áreas da Administración galega.

Un total de 248 prazas, o 40% do total, son de libre acceso e a elas poderá acceder calquera persona que queira traballar na Xunta e que cumpra os requisitos de acceso.

As outras 366 prazas son de promoción interna, é dicir, reservadas a persoal que xa traballa na Administración galega e que quere promocionar a un posto de maior categoría ou que se adapta mellor ás súas preferencias.

Segundo informa a Xunta nun comunicado, trátase da maior convocatoria simultánea de oposicións no campo da Administración xeral nos últimos anos.

PRAZAS
Entre as convocatorias que se publican esta semana no Diario Oficial de Galicia inclúese as oposicións de libre acceso para cubrir 76 prazas na categoría de camareiro-limpador e axudante de cociña, coas que se reforzarán os centros de servizos sociais dependentes da Xunta. Son as primeiras oposicións convocadas nesta categoría desde 2006 e nelas poderá participar calquera persona que acredite ter o certificado de escolaridade obrigatoria.

Ademais, a Xunta tamén convoca 121 prazas de acceso libre para reforzar as distintas consellerías. Desta cifra, 53 prazas correspóndense con auxiliares administrativos (grupo C2), 38 para o corpo superior da Administración (grupo A1) e outras 30 prazas para o corpo de xestión da Administración (grupo A2).

A Xunta inclúe tamén nestas convocatorias de acceso libre 51 prazas de alta especialización, que inclúen 28 prazas en catro escalas de enxeñaría, 16 prazas para a escala superior e técnica de finanzas e outras 7 para a escala de informáticos e para inspección urbanística.

En canto á promoción interna, as convocatorias contan con 350 prazas para persoal de consellerías --incluídas 44 para grupo A1, 70 no grupo A2, 130 no grupo C1 e 106 no C2-- e outras 16 prazas para escalas de informática.

INSCRICIÓN EN OPOSICIÓNS
As 18 convocatorias publicaranse no Diario Oficial de Galicia entre mércores e xoves. Todas as convocatorias incluirán as normas xerais, os requisitos que deberán posuír as persoas que queren inscribirse nas probas e os programas que rexerán os distintos procesos selectivos.

Os interesados en participar nestas oposicións poderán presentar a súa solicitude no prazo de 20 días naturais, que comeza a contar desde o día seguinte á publicación da convocatoria no DOG. Posteriormente, a Xunta publicará a lista de persoas admitidas e excluídas en cada convocatoria.

Grupo Correo Gallego
Ante calquera dúbida, problema ou comentario nas páxinas de Galicia Hoxe envíe un e-mail a info@galicia-hoxe.com. Titularidade e política de privacidade. Política de Cookies
Auditoría Audiencia Sites
Titulares RSS