FERROL. EP
O conselleiro de Economía e Industria, Javier Guerra, apostou por fomentar a creación "dun novo sector industrial" en Galicia dentro das enerxías renovables, o da undimotriz --producida polo movemento das ondas--, no que vai "un elevado potencial" e para o que a Xunta prepara unha norma.
Guerra, que visitou este venres a primeira boia para estudar as posibilidades desta enerxía, fondeada dende xullo na ría de Ares, explicou que o departamento que dirixe promove un proxecto experimental que desenvolve en Ferrol en colaboración coa empresa Galicia Mar Renovables.
A boia é un prototipo co que a que espera chegar a producir un millón de megavatios cada hora, o que suporía suficiente enerxía para abastecer 300 familias durante un ano.
O conselleiro destacou que a Comunidade galega ten un elevado potencial nesta enerxía e que a súa explotación é unha das posibles opcións para alcanzar un incremento significativo das enerxías renovables nas próximas décadas". "Temos neste tipo de enerxía unha oportunidade de futuro", dixo.
Así mesmo, o titular de Economía e Industria afirmou que o aproveitamento da enerxía das ondas "é xa unha realidade", con "grandes perspectivas de crecemento, nas costas de Ferrol". Por iso, o Goberno galego elabora unha normativa reguladora da actividade, que converta a Galicia na primeira comunidade de España cunha "norma clara" sobre o sector.
"Queremos situar a Galicia á vangarda da enerxía undimotriz, xerando un sector tecnolóxico, industrial e social con grandes perspectivas de creación de emprego", proclamou. Ademais, referiuse ao Plan Ferrol, dentro do que incluíu esta iniciativa. Este programa, dixo céntrase na innovación empresarial e o fomento das enerxías renovables.
No que vai de ano, destacou, a Xunta apoiou investimentos por máis de 150 millóns de eiros, con case 70 millóns de axudas concedidas dentro da estratexia de dinamización do tecido comercial e produtivo das bisbarras de Ferrolterra, Eume e Ortegal.
RSS
