A Xunta volve garantir a "blindaxe" dos ríos ante novas centrais

O presidente de Augas de Galicia, Francisco Menéndez, garantiu que o Plan Hidrolóxico de Galicia-Costa "vai cumprir" o acordo polo que os tres grupos con representación no arco parlamentario galego aprobaron, o pasado día 8 de febreiro, declarar os ríos da comunidade "libres de novos aproveitamentos hidroeléctricos".

A moción, impulsada polo PSdeG e transaccionada con nacionalistas e populares, indica que a Xunta deberá realizar "os trámites necesarios" para evitar a construción das 33 novas centrais que figuran no borrador, sometido por entón a información pública -ata o pasado 20 de febreiro-.

Sobre este punto e o seu futuro cumprimento no documento debateron o presidente de Augas e a deputada socialista Carmen Gallego durante a comparecencia do primeiro na comisión de Medio da Cámara autonómica. "Vostede deixou unha porta aberta a aquelas centrais que puidesen salvar os obstáculos ambientais", reprochou a voceiro do PSdeG, sobre a intervención de Francisco Menéndez.

"Estas son novas". "Pois igual estou errado", dixo

Fronte a isto, esixiu que, en función do ditado unánime das forzas políticas galegas, non se deixe "ningunha abertura para coar algunha central". Na quenda de réplica, o responsable do organismo autonómico precisou que "o plan non prevía nin deixaba de prever" as 33 centrais, ó considerar que simplemente "se contemplaban, posto que existen". Pola súa banda, Gallego volveu censurar que Menéndez "fala das -centrais- que sexan de repotenciación e que non supoñan un dano" ó medio e contrapuxo: "E que estas 33 son novas". "Igual estou errado", apuntou o presidente de Augas de Galicia, para insistir en que "en todo caso, vaise cumprir" o mandato do Pazo do Hórreo.